هئی بورالاردا اسن یئل
یالنیز قوش قووانلاری قورخوداجاقسان
قارغالار بئله اوچوب گئدیبدیلر بورادان
من
من نه‌یی گؤزله‌ییرم؟
دئییرلر اسکی بیر کاغید پارچاسی بورالاردا ایتیب
اوزرینده منیم آدیم یازیلمیش‌ایمیش
سن، سن او کاغیذ پارچاسینی گؤرمه‌دین‌می
سن
سن منیم آدیمی بیلیرمیسن؟
---
قوش قووان: مترسک
سئوگین منه اؤیرتدی
اؤیرتدی حوزونلو اولماغی
عصیرلر بویونجا
منی ان حوزونلواینسان قیلان
بیر قادینا موحتاجیمیشام
بیر قادین
قوللارینین آراسیندا سئرچه کیمی آغلایام
بیر قادین
سینیق بلور پارچالاری کیمی
پارچالاریمی ییغا
سن
شعرلریمدن اوغورلانان لیلا
اؤلکه‌میزدن اوغورلانان قاناد
قارانلیقدا آزدیریلمیش کپنک‌سن
1)
ریوایت وارکی
بوتون ریوایت‌لر یالاندیر
گؤرن‌لر اؤیله محو اولوبلار کی اونودوبدورلار
تانرینی اؤلدوروب گئتدین
شیطان آخدی آرخانجا
جنت تانری
جهنم
شیطان
سئوگی سن..
حیاتیم بوشالدی کیلاسیک آنلاملاردان
نه من سنه شراب تؤکه بیلدیم
نه سن منه هولدئرلین اوخودون
تورات یوروملاریندا یوماقلاندی بویوموز
و آرزیلاریمیز
دلی بیر کپنه‌یین قانادیندا شؤعله‌یه دوغرولدو
سنی ده اوتوزسام
فیت چالا چالا بوتون شهرلری گؤرمزدن گئچه بیلرم
انتحار سو ایچیم اولار
خاطیره‌لر زیبیل قابینا تؤکولر
نه هله‌لیک
نه همیشه‌لیک
بو نه وار، نه یوخلوغوموزدا
آلیشمالیییق دوروما
سووشدو داها اؤپوش آنلامینی داشییان اؤپوشلر
