سئوگین منه اؤیرتدی .../ نزاری قبانی
سئوگین منه اؤیرتدی
اؤیرتدی حوزونلو اولماغی
عصیرلر بویونجا
منی ان حوزونلواینسان قیلان
بیر قادینا موحتاجیمیشام
بیر قادین
قوللارینین آراسیندا سئرچه کیمی آغلایام
بیر قادین
سینیق بلور پارچالاری کیمی
پارچالاریمی ییغا
سنین سئوگین
منه ان پیس عادتلری اؤیرتدی
هر گئجه مین دؤنه قهوه فالی آچماغی
تورکه داوا ساتانلارین یانینا گئتمه‌یی
فالچی‌لارین قاپیسینی چالماغی
منه اؤیرتدی ائویمدن ائشییه چیخام
اسکله‌لر چییینیده سنی ایزله‌یم
هاوا آلانلاریندا
ماشینلارین ایشیغیندا
رئکلام واراقلاریندا حتی
آختارام سنی
سئوگین منه اؤیرتدی
بیر قاراچی توکونو اختارارکن
ساعاتلارجا اؤز اوزومه دالام
بوتون قاراچیلار اونا گیجیک ائدیر
بیر بنیزی آختارماق ... بیر سسی
او سسلرین بوتونو
او اوزلرین بوتونودور
سئوگین منه اؤیرتدی
سنی نئجه‌سینه سئوم بوتون شئی‌لرده
قورو آغاجدا
ساری قوروموش یارپاقلاردا
یاغیشلی هاوادا
چنده
ان کیچیک قفه‌لرده
آخشاملار اورادا قارا قهوه‌میزی ایچیریک
سئوگین اؤیرتدی سیغینام
آدسیز هوتئل‌لره
آدسیز کیلیسالارا
آدسیز قفه‌لره
سئوگین منه اؤیرتدی
گئجه نئجه‌سینه چوخالدار غریب‌لرین حوزونلرینی...
سئوگین منه اؤیرتدی...
اوشاقلار کیمی داورانام
گچ ایله دووارلارا چکم شکیلینی
بالیق توتانلارین یئلکن‌لرینه
چانلار اوزرینه
سئوگین منه اؤیرتدی
سئوگی نئجه ده‌ییشه‌ر زامانلار خریطه‌سینی
منه اؤِیرتدی
سنی سئونده یئر کوره‌سی دولانماقدان بویون قاچیرار
سئوگین نه‌لر اؤیرتدی منه...
موطلق سایا گلمز
اوشاق ناغیللاری اوخودوم
جین‌لر پادشاه‌لارینین قصیرینه گیردیم
و رؤیادا گؤردوم
پادشاه قیزینی منه وئریر
اونون گؤزلری ... کؤرفزلر سویوندان دورو
او دوداقلاری ... نار چیچکلریندن دادیمسامالی
یوخودا گؤردوم شووالیه‌لر کیمی اونو قاچیریرام
یوخودا گؤردوم
اونا لؤلؤ ایله مرجان بویونباغیلاری هدیه ائدیرم
سئوگین منه اؤیرتدی ... هذیانین نه اولدوغونو
اؤیرتدی نئجه سووشور عؤمور
و گلمیر خاقان قیزی...
منه اؤیرتدی ... بئیروتو نئجه گؤرم
بیر قادیندیر ... ظالیم ... دیکتاتور
بیر قادین
هر گئجه
ان گؤزل پالتارلارینی گئییر
سینه‌لری اوزرینه اودکلن سپیر
گمیچیلر اوچون
پادیشاهلار اوچون
منه اؤیرتدی سئوگین ...
آغلامادان آغلایام
اؤیرتدی
حوزون نئجه یوخلار
قیچی کسیک بیر برده کیمی ...
"الروشه" ایله "الحمرا" یوللاریندا
سئوگین منه اؤیرتدی
اؤیرتدی حوزونلو اولماغی
عصیرلر بویونجا
منی ان حوزونلواینسان قیلان
بیر قادینا موحتاجیمیشام
بیر قادین
قوللارینین آراسیندا سئرچه کیمی آغلایام
بیر قادین
سینیق بلور پارچالاری کیمی
پارچالاریمی ییغا
نزار قبانی
چئویرن: سید حیدر بیات
