دیرناق آراسی یازیلار

و سئوگی بیر اورک شکیلی‌ایدی رئکلام اولوردو بوتون مئدیالاردا

منده سئوگی اورک دئییلدی

بیر سیگاراایدی

سنه داریخاندا

خییاوان قیراغیندا چکدیم

کیملی‌ییمی سوراجاقدی پولیسلر

و نده‌ن بئله سیگارا ایچمه‌ییمی

سئوگی بیر جئیران شکیلی‌ایدی بیر قیز

استعاره اولاراق اؤزونو توخوموشدو سئوگیلی‌سینین شالیندا

بوینوما سالیب دولانیردیم خیاوانلاری

کیملی‌ییمی سوراجاقدی پولیسلر

آی پولیس!

کیملی‌ییم جیبیمده دئییل

بیر گولوشدور بیر قیز اوزاق شهرلرده منه هدیه ائدیب‌دیر

من گؤرمه‌میشم او قیزی

گؤرمه‌میشم اونون گولوشونو

اما شکیلی بوینومدادیر باخ

بیر جئیران شکیلی‌دیر توخویوب استعاره اولاراق

و بلکه کیملیک‌سیزدیر بو شهرین پولیسلری ده

اونلارین دا یولداشلاری بیر سیگارادیر کوماندانلاری‌نین گؤزلریندن گیزلی

گئجه یاریلاری اوزاق شهرلره دوغرو باخیب چکرلر

اوست اوسته غریبه شهردیر اؤلکه‌میزین بو شهری

یانی هر شهری

یارغیچیلار متهم آیناسیندا اؤزلرینی گؤرر

و متهم‌لر

یارغیچی گؤزلرینده گیزلنمیش اوزون اوزادی اوزاقلاردان گلن بیر حوزون ایشیلتی‌سینی

و دوغروسو یارغیچی گؤزلرینده اولان حوزون سورکلی ایشیلتی‌دیر

*

اوسته‌لیک

هر کس هر نه یازیر یازسین

من

گؤزلرینه محکوم اولموشدوم

اوزون بیر دوستاق یاشادیم ائوینده

و بوتون محبسلرین آدینی لیسته‌له‌ییب ازبرله‌دیک سعید متین پورلا

سونرا گؤردوم

من ائشیکده‌ دوستاق، او ایچریده

ایکیمیز ده کیتاب اوخویوردوق

و آغرییاندا اوره‌ییمز برکدن سیخیردیق بارماقلیقلاری

سسیمیز چیخمیردی ائشیتمه‌سین دوشمان

و دوشمان بیر دوستاق ایدی اؤز دوشونجه‌سینده

سودان و آینادان و گونشدن قورخوردو

سعیدین گؤزلرینده بیر جنت وارایدی آغاجلاریلا آرخلاریلا

و دوشمن سودان و آینادان و گونشدن و جنت‌دن و سعیددن قورخوردو

و سعیدین گؤزلرینده...

و پولیسلر باخیب آغلادیلار منیم سیگارالاریمی

و پولیسلر باخیب آغلادیلار جئیران شکیلینه شال اوزرینده

و من سویوقدا قاییتدیم اوزون اوزادی یولو شهرین او خییاوانلاریندان بو خییاوانلارینا

کشیک ده‌ییشیردی پولیسلر

یئنی گلن پولیسلر

یئنه آغلایاجاقدیلار

آذر آیی – قوم

سید حیدر بیات