عباس بابائی‌نین آنیسینا
کلاسیک ادبیاتیمیزدا "می" موتیفینین چشیدلی ایشله‌ولری(کارکرد) وار. «می» کیمی زامانلار یاسال قوراللاری سیندیریب دونیادا آزاد یاشاماق سیمگه‌سی، کیمی زامان بوتون مادی دونیانی سؤکوب معنوی بیر دونیایا کئچمک رمزی، کیمی زامان یئنی بیر قوروم قورماغا یاردیمجی اولان بیر سمبولدور.
عباس بابائی اوغورلو نئو کلاسیک بیر شاعیر اولاراق می موتیفیندن یارارلانسا دا،آنجاق شعرینده آرتیق "ساز" موتیفینه یئر وئریب‌دیر. ساز اونون شعرینده بیزی آزادلیغا یئتیرن و "عاشیق"، توپلومون روحو و رهبری‌دیر. اونون دونیاسیندا عاشیق علسکرین چوخ اؤزل بیر یئری واردیر.
بابائی توپلومون حرکتینی، جسارت تاپماسینی، سازا و عاشیقا باغلاییر. اونون شعرینده کی عاشیق دئمک ویکتور خارانی دا آدامین یادینا سالیر. ساز غملی کئچمیشی ریوایت ائدیر: «بیر سازیم وار سسی زیردن بمه غمدیر...» و سازین هر سیمی بیر نسیلی بیر قوشاغی تمثیل ائدیر:
سؤیلردی آتام قالدی بابامین باباسیندان
دیندیرمه کؤکون هر سیمی بیر نسله حکم‌دیر
ساز حماسه‌یه سبب اولور و گله‌جک اونا باغلانیر:
سوروشدوم چنلی بئل یوردون، یولوندان
دئدی عاشیق جنون سؤیلردی اوندان
ایگیدلر ایچره واردیر مین کوراوغلو
بو یئر بوش قالماسین عاشیق جنوندان
حسین منزوی‌نین کوراوغلویا یازدیغی فارسجا "روشن" منظومه‌سی ایله عباس بابائی‌نین شعرلرینی یان یانا قویاندا بو ایکی زنگانلی شاعیرین دونیاسیندا، بیر شئیی آیدینجا گؤره بیلیریک: هر ایکی شاعیرین دونیاسیندا کوراوغلو بیرینجی قهرماندیر. منجه بو مسئله اولدوقجا اؤنملی‌دیر. بوشونا دئییل کی شهریار دا حیدربابا منظومه‌سینین سونوندا ایوازی گؤزله‌ییر: ایواز گلیب چاتمایینجا یاتمارام.
دئمک منزوی کوراوغلونون اؤزونو اومودسوز بیر دورومدا گؤزله‌ییر:
می‌ترسم، ای چشم و چراغ طایفه!
ای خون سرخ معجزه،
در بازوان ایل!
تا بازگردی،
دیر باشد.
شهریار ایسه کوراوغلونون یئنی مودئلینی، یئنی وئرسییاسینی گؤزله‌ییر. او بلکه بیلیر کوراوغلونون واختی سووشوبدور، کوراوغلو اؤزو ده بونو بیلیر. اما بیریسی گلمه‌لیدیر، فروغ دئمیشدی: کسی که ...
اما عباس بابائی باشقا آچیدان باخیر. بیز سازا دؤنمه‌لی‌ییک، سؤزله ساز بیرلشمه‌لیدیر. "عاشیق" یارانمالی‌دیر. اما بو عاشیق حسین منزوی دئین عاشیق دئییل. منزوی‌نین عاشیق – قهرمانی بئله بیر اینساندیر:
در ذهن من عینیتی سخت و شگفت انگیز دارد
مردی که با یک دست شمشیر،
با دست دیگر ساز می‌زد
اما عباس بابائی دئین عاشیق فرقلی‌دیر. تام مجنون بیر عاشیق، عاشیق جنون، دلی بیر شامان! او یارانمایینجا کوراوغلو دا اوزه چیخا بیلمز. چونکی ذاتن کوراوغلولار توپلومدا چوخدور. اونلاری معنوی عامیل‌لر، عاشیقلار دیرچلدیب توپلوما سونا بیلر.
دوغرودور، ایگید و قهرمان قاورامی بو عصرین او بیری اوجوندا قویلانیب قالیب‌دیر. آد چکدی‌ییمیز شاعیرلرده هامیسی بیر چئشیت نئوکلاسیک شاعیر ساییلیرلار. اما عباس بابائی‌نین بصیرتی بو قونودا منی همیشه حئیرته سالیب‌دیر. او دا بیر عاشیق جنون ایدی، ساز نغمه‌لرییله اوچوب آرامیزدان گئتدی.
بیات جنلابلار ی
رحمت لیک عباس بابائی نین شعریتینه گوره یازدیغیز تحلیل دن چوخ فایدالاندیم. وار اولون کی کور اوغلونو بو بویوک شاعیر لرین سوزونده گوروبسونوز. قلمیز وار اولسون.