دیرناق آراسی یازیلار

تانرینی اؤلدوروب گئتدین
شیطان آخدی آرخانجا
جنت تانری
جهنم شیطان
سئوگی سن..
حیاتیم بوشالدی کیلاسیک آنلاملاردان
و مودئرن آنلاملار مثلا آزادلیق
نفت شؤعله‌لرینده یانمیشدی باتیدان دوغویا
آنلامسیز آلانلاردا آددیملادیم
نه سئومه‌یه بایقوش وارایدی
نه دالدالانماغا کاکتوس
*
مثنوی‌ده‌کی طوطی
قفس ایچینده گؤزله‌دی
گؤزله‌دی
تاجیر کیشی هیندیستاندان گئری دؤنمه‌دی
*
آه زولیخا
بو قویولار سنی موشتولوق وئرمیرلر
چونکی
منی بورا
قارداشلاریم سالمادیلار
سن سالدین.