دیرناق آراسی یازیلار

پیر بوردیو دئییر بؤیوک ساتیش یئرلری (فروشگاه‌لار) یوخسوللوق سرگیسیدیر. یوخسوللار اونا باخاندا اؤز یوخسوللوقلارینی و حیاتلاریندا اولان بوشلوقلاری یاخشی باشا دوشرلر. بایرام دا بیزده تام ائله بیر  دوروما دوشوب. اولمایان صمیمیت‌لر، حیات‌دا اولمایان دوستلار، عزیزلر، عائیله‌سی یانیندا اولمایان دوستاقلار. آرادان گئدیب یئرینی دولدورا بیلمه‌دی‌ییمز گله‌نکلر (سنت‌لر). 

بیزیم توپلوم اوزون زاماندان بری داها اؤزو دئییل. دؤولت هر شئیی الینه آلیب اما گتیردی‌یی عیبه‌جر باسما شئی‌لرله ده هئچ بیر شئیین یئرینی دولدورماغی باشارماییب‌دیر. بو بوشلوقلار سیاست‌ده، اقتصاددا، امنیت‌ده و باشقا باشقا ساحه‌لرده چیلپاقجاسینا هر گون اؤزونو سرگیله‌مکده‌دیر. بو بوشلوق بایرام گونلری هر زاماندان آرتیق اؤزونو گؤستریر. بایرامدا اینسانلار هر شئیین مکمل بیچیمینی ایستیرلر. دولو بزه‌نمیش سیرفا - هر کسین اؤز اولاناقلارینا و طبقه‌سینه گؤره-، موتلو بیر بیری‌نین یانیندا اولان عائیله، عائیله‌لری‌نین دوزگون ایلیشگی‌سی و داورانیش، گله‌نک‌لرین، عنعه‌لرین دیریلیشی و داوامی. بونلار اولمایان بیر توپلومدا ایسه بایرام نیسگیل‌لر سرگیسی‌نه دؤنور. 

بوتون بونلارا رغمن اومورام اؤنوموزده کی ایل یاخشی ایل اولا و دوستلارا یاخشی گونلر آرزیلاییرام. سعید،‌ ابراهیم، محمود فضلی، حمید نادارلی، اکبر ازاد، علیرضا فرشی، یورش بی، لطیف بی و باشقا دوستلارین اوزونو گؤره بیلک.