دیرناق آراسی یازیلار

آزربایجانیمیزین اوغورلو شعرلریندن چئویریلر - اوخونوشلار
 
آزربایجانین دیرلی چاغداش شاعیری حیدر بیات جنابلاری نین " یالانچیلار" شعرینین قیسا اوخونوشو و فارسجایا چئویریسی
 
اوشاقلیقدا
آی اللریمی آلداتدی گؤلمه‌جه‌ده
جاوانلیقدا
سن اوره‌ییمی آلداتدین

حیط‌ده

ایندی باخیرام

یول آیاقلاریمی آلدادیب

کوچه ده

 ایلک ترجومه سی و سونرا اوخونوشو :

در کودکی

ماه در برکه فریبم داد

در جوانی

تو دلم را فریفتی

اکنون می نگرم

راه پاهایم را فریب داده است

در کوچه

بو شعرین ذهنی فضاسینی ساغلاین اوچ تصویر ایچ- ایچه کئچه رک اونون بوتونلویونه بیر ساختاری تصویر ساغلامیشدیر. بو اوزدن بو شعره بیز تصویر- محور بیر شعر دئیه بیله ریک. اوچ یاناشی استعاری فضاسی بیر انسانین یاشامی نین اوچ موختلف بؤلومونو حرفی بیان لا دئییل، نشانه لریله جانلاندیرا بیلمیشدیر. بیر انسانین (البته کی ایلک اولاراق شاعیرین اؤز حدیث نفسینی،) خطی بیر روایت له یوخ، بلکه زامانسیز- مکانسیز رقصان حلقوی اوچ تصویرلریله عمودی بیر دورومدا دئمه دن گؤسترمکده دیر. شاعیر بیر معمار کیمی واژه لری سون درجه دقت، وسواس و هابئله اقتصادی اولاراق( اقتصاد کلام) سئچیب و ایماژیستی شعره گره کن گؤرکملی بیر ذهن فضاسی و پرسپئکتیو ساغلامیشدیر منجه.شعرین یازیلماسیندا هئچ بیر یاپمالیق و عمد گؤرونمه دن شاعیرین ناخود آگاهیندان جوشوب گلیب کاغیذ اوستونه جالانمیشدیر داها دوغروسو.دیل تورکجه میز باخیمندان( البته من باشاردیغیم قدر)ساغلام دیر، آخیجی دیر. تاخیر معنایی و تاویل پذیری بو شعرده تورکجه میزین نورملارینی پوزماقدا یوخ، واژه لرین یان- یانا قونشولوغوندان و اوندا ایشله نن ابهاملی تصویرلردن سونوجلاناندیر. شعرین متنی خود- ارجاعی دیر( من تاسوفله بو ادبی- زیبایی شناختی واژه لره معادل بیلمه دن فارسیلارینی ایشله دیرم). یعنی متنین دونیشاسی ائشیک دونیانین کوپیسی دئئیل، اؤزونه خاص بیر ذهنی دونیادیر.سوررئال بیر دونیا.(شعر هرتور اولورسا سونوندا سوررئال اولمالیدیر). شعرین مرکزی موتیوی راوی نین حیاتی نین موختلف بؤلوملرینین منشورونون موختلف وجه لریدیر. بو منشور اوچ بعدی اولاراق عمودی تصویرلرله اوخوجونون گؤزونون اؤنونده فیرلانیر و گؤزونو اوخشاییر.نوستالژیک شاعرانه بیر روایت دیر بو قیسا و ایجازلی شعر.تصویرلرساده بیر گؤلمه جه دن باشلایاراق سونوندا آنلامین موختلف و درین تاویل اولونان قاتلارینا ایشله میشدیر داها دوغروسو. یوللارین آلداتماسی متنین ائشیینده بیر چوخ آلدانیشلاری تداعی ائده بیلیر. بو شعر همده گؤزل رومانتیک بیر شعریدیر.بیرینجی شخص اولان راوی نین و داها دوغروسو منیم، سنین، اونون و باشقا "دیگر"لرین فردی رومانتیک آلدانیشلارینین نمونه سیدیر.