پینه‌چی قوجا کیشی و منیم دویغولاریم
بیر افغانلی قوجا کیشی وار یولومون اوستونده، هر گون گؤره‌رم. پینه‌چی‌دیر. هر زامان اونو گؤردوکده اؤز اؤزومه دئیردیم: سن آللاه باخ! ایندی یولدان کئچن اوشاقلار بونا باخاندا بیلمیرلر بو ابوریحان بیرونی‌نین، مؤولانانین، سنائی‌نین یوردداشی‌دیر و دونیا قودرتلری‌نین ساغ سول ساواشی بونو گتیریب بورا چیخاریب.
بیر نئچه موددتدیر آنجاق فیکیریمی ده‌ییشمیشم. اگر او آدلارینی چکدی‌ییمیز آداملار دوزگون فیکیرلشسئیدیلر بیزلر ایندی بو گونلری‌می یاشاییردیق؟
و یئنه فیکیرلشیرم دوغرودان دوزگون فیکیرلشن اینسانلار کیم‌لردیرلر؟ مثلا یونانین او گونه دوشمه‌سی نه‌دن آسیلی‌دیر؟
و هئی بئله بئله فیکیرلشیرم و تاریخ بویاسینی ایتیریر بئینیمده، ایندی و گله‌جک جانلانیر گؤزومون اؤنونده، دار دوده‌ک کوچه‌لری آددیملاییرام...یاغیش یاغیر... اوزاقلاردا بیریسی منه فیکیرلشیر بلکه... و یاغیش‌دا بیر قیز سئوگیلی‌سینین آدینی یازیر آرابانین شوشه‌سینه...
بیر ده فیکیرلشیرم بیز همیشه اؤز زامانیمیزی بوتون کائناتین معیاری بیلیریک. بعضن ده کائناتی یاشادیغیمیز لحظه ایله اؤلچوروک.
«بیز یاشایان جوغرافییادا هر شئی‌دن آرتیق اخلاقین یئری بوش گؤرونور.»
سلام.
سید من بو و باشقا جریان لاردا ائله سیزین اوسته کی بازدیغیز مطلبی تأثیرسیز گؤرمورم. من دئییرم کاش سوسیالیسم عوضینه اخلاقیسم مکتبی یارانئیدی. بو اولسا دوزه لر هر شئی. تعهد یارانار و باشقا شئی لر و یاشام دوزه لر. اما بو اخلاق اؤزو چوخ چتین دیر و اونا گؤره ده میللت بیر سیرا اخلاقی جریان لارا آرمان آدی وئریر. صداقت آرمان دئییر بیر خصلت بشری و انسانی دیر اما چتین اولدوغونا ایندی داها لاپ آرمان گؤرونور. یاشا سید.