سعید! ماندیللا اؤلدو
بیر بالاجا قارداشیم وارایدی نئچه هفته‌لیک ایدی بیلمیرم، خسته اولموشدو. آتام تهراندا خسته خانادا ایدی. منیم ایسه آلتی یاشم اولار اولماز. صبح یوخودان گؤزومو آچدیقدا گؤردوم آنام کورسونون او بیری بوجاغیندا ایچینی چکیر. منه باخیب دئدی: سئیید حیدر ببه اؤلدو.
بیلمیرم نئچه ساعات اویاق قالیب آغلامیشدی. آنجاق امینم او سؤزو منه دئیندن سونرا بؤیوک بیر یوک بوینوندان گؤتورولدو. ایندی ده نلسون ماندیللانین اؤلوم خبرینی گئجه ساعات اوچ یاریمدا اوخویارکن ائله بیر حیس ال وئردی بیله‌مه. کیمیسینی اویادیب دئیم: ... ماندیللا اؤلدو.
و ایستر ایسته‌مز سعید یادیما دوشور. هر زمان سعید یادیما دوشر: سعید! ماندیللا اؤلدو.
ی س: لوموند قزئته‌سی ماندیللانین 1964جو ایلده دانیشدیغی نئچه جومله‌نی نقل ائدیب، ماراقلی‌دیر:
من ایللر بویو آغلارین و قارالارین گوج دئمه‌سینه قارشی ساواشدیم. منیم ایده‌آلیم اینسانلارین توپلومدا اؤزگور و برابر یاشایا بیلمه‌سیدیر؛ و گره‌کیرسه بو ایده‌ال اوچون اؤلمه‌یه حاضیرام.
