یورغونام آی تولدو!
هر دؤنه بیر شئی یازاندا سؤزلوگه باخمالییام. بو دؤنه ده گرک باخام گؤرم: قای‌ننه یازیلمالی یوخسا قایین آنا... آنا...
بلکه ده تورکلر بیر چوخ اؤلکه‌لرده بو مین ایللیکده هئچ زامان سؤزجوکلرین بیر چوخونو نئجه یازاجاقلاریندا قطعی قرارا چاتا بیلمه‌ییبلر. هله چوخو دا بو دیلین مکتوب بیر دیل اولدوغونو ایسته‌مه‌ییبلر. حیات ایکی دوزئی‌ده گئدیر بیزیم ایچیمیزده. اوخشامالار جان یاندیریجی‌دیر. هانسی عصیرلردن یادیگار قالان آغیت هاوالارینی یالنیز اؤلوم اوزه چیخاریر. رسمی دیل بیر قیراغا قویولور، شریعت بیله گله‌نکلری اونایلاییب، امضالاماق زوروندا قالیر، نامحرملر ده سسی ائشیدیرلر ائشیت‌سینلر: ننه ننه اوی ننه... ننم باجیم اوی...
هله پیئر بوردیو بورادا اولسایدی حتمن آروادلارین کیشی‌لرله یاناشی گلمه‌سینه دیققت ائده‌جه‌یدی؛ فمنیسم حرکاتلاری مزارلیقلاردا دا اوزونو گؤستریر، داها قادینلار دوشمه‌ییرلر ارککلرین دالیسینجا، اونلارین یانیندا اوزون بیر ایکی اوچ قات شریط کیمی اوزانیرلار تابیتین یانیندان حیاتا کیمی.
خانیم دئییر یادیندا ننه‌نین ساچلارینی اوخشادین جان وئرندن سونرا، من ده آنامین ساچلارینی اوخشادیم...
ساچلار گؤمولور، گؤمولمه‌ییر قالیر اوخشایانین اللرینده، بئینینده، حیاتین بو تاییندا... بئش کیتابلیق فیکیرلشیرم خسته خانادان مزارلیغا، و یورولورام بئش عؤمورلوک، یاساق بیر آد آهیمی دولدورور... آچیب قوتادغو بیلیگه باخیرام: آی تولدونون ساراییندا اولکر اولدوزو پارلاییر، آی گونشین یولونو گؤزله‌ییر، یورغونام آی تولدو!... یولداشلار هر طرفدن باش ساغلیغی وئریرلر... آی تولدو گولومسه‌ییر: هامیسی ساغ اولسونلار.
---
آی تولدو: آی دولدو، دولون آی، قوتادغو بیلیکده گئدن اساس شخصیت‌لرین بیریسینین آدی. بو شخصیتی چوخ سئوه‌رم ... امیر علیشیر... هرات...
