شامان زلزله‌نی روایت ائده بیلمه‌ییر
سون یوز ایللیک‌لرده ساوه منطقه‌سینده باش وئرن طبیعی اولایلاری همیشه اوزانلار آنلادیبلار. بؤیوک قحط‌لیک گتیرن قیشین ماجرالارینا تیلیم خانین شعرلرینده راست گلمک اولار و او بؤلگه‌‌ده گلن داغیدیجی ودیده‌رگین سالان سئلین اولایینی عاشیق رضعلی او منطقه‌نین ادبیات تاریخینده ثبت ائدیب‌دیر:
سیزه تعریف ائدیم خلج خانلاری
تامام سئل آپاردی دگیرمان‌لاری
خلج خانلارینا یازیلان بو شعر ائله هر شئیی بیرینجی بئیتده دئییب قورتاریر. خلج خانلاری ایسه یانیلماسام چمریم کندینده ( رحمتلیک دوکتور مصطفی چمرانین دوغوم یوردوندا) یاشارمیشلار. بو خانلار چوخ گوجلو و گؤرکملی خانلارایمیشلار. بونلارین بیریسی‌نین بیر ییرتیجی قوشو واریمیش. ناصرالدین شاه بو قوشون وصفینی ائشیدیب آدام گؤندریب قوشو خاندان ایسته‌ییر. خانین ابهتی او قدر ایمیش کی شاهین ائلچی‌لری نئچه گون خانلیغین قوناقلیق اودالاریندا قالاندان سونرا جرئت ائدیب شاهین ایسته‌یینی دئیه بیلمه‌ییرمیشلر. نهایت بیر گون خان اونلاردان نه اوچون گلدیکلرینی سوروشور. اونلار دا شاهین ایسته‌یینی دئییرلر. خان اؤفکه‌له‌نیب قوشون قیچلاریندان یاپیشیب آرادان ایکی‌یه بؤلوب دئییر: «گئدین ناصیرا (ناصرالدین شاها) دئیین صاباح منیم ناموسوما دا گؤزو دوشسه آدام گؤندریب ایسته‌یه‌جک‌می؟» ( بو خاطیره‌نی چمریم کندینده بیر قوجا کیشی بیزه تعریفله‌دی)
نسه، ایندی عاشیق رضعلی‌نین دوغما یوردو اولان "سنگگ" کندینده دپره‌م سونراسی دوروم هئچ ده یاخشی دئییل. بو ده‌پرم قوربان بایرامی گلدی یانیلماسام. مهندس اسدالله امیری او زامان بیر اس ام اس ده بونو یازمیشدی بیله‌مه. ائله بیل مهندس گئدیب یاخیندان گؤرموشدو کندی و عاشیق رضعلی‌نین ده مزارینی زیارت ائتمیشدی.
ایندی قیش گلیب و سنگک‌لیلر چادیر ایچینده یاشاییرلار، آرتیق عاشیق رضعلی ده یوخدور حادیثه‌نی ریوایت ائتسین.
ی س:
1. سنگک کندی‌نین ایندیکی دورومونو تابناک دوشرگه‌سینده اوخویا بیلرسیز:
روستای زلزله‌زده «سنگک»عاشیق رضعلی حاقدا رحمتلیک دوکتور علی کمالی وارلیق درگی‌سینین 35 جی ساییندا بیر مقاله یازیب، مقاله‌نی بورادان ائندیره بیلیرسیز:
دانلود
آچیقلاما: سنککلی عاشیق رضعلی - دوکتور علی کمالی
