"نه" باغلاییجی‌سی حاقدا بیر کیچیک آچیقلاما
Wednesday, 20 November 2013، 09:22 AM
ائشیتدیم دوستلارین بیریسی‌نین فیس بوک صحیفه‌سینده "نه معراج، نه عارفانه بیر یوکسه‌لیش" جومله‌لریله باشلانان شعریمه "نه" باغلایینجی‌سینی قوللاندیغیما گؤره بیر سیرا تنقیدلر اولوب. دوغروسو "نه" باغلاییجیسی‌نین بو ایشله‌وی (کارکردی) منه دوغال اولدوغو اوچون هئچ اوزرینده دوشونمه‌میشدیم. اما بو تنقیدی ائشیدندن سونرا دوشونمه‌یه باشلادیم و الده اولان قایناقلارا باخدیم. تورکیه‌نین TDK سؤزلویونده "نه"نین بو ایشله‌وینه موطلق ایشاره اولونمامیشدی. اما آذربایجان ایضاحلی لوغتینده بئله بیر آچیقلاما گلیب:
ساده جومله‌لرده هم جنس عضولری مرکب جومله‌لرده‌یسه اونون ترکیبینه داخیل اولان جومله‌لری بیر بیرینه باغلاییر... نه شیش یانسین نه کباب،
(مثل) نه گؤز گؤرسون نه اورک بولانسین (مثل) نه بیر ایشیق گؤرونور نه ده بیر حیات سسی ائشیدیلیردی. ج. سلطنت نه دؤندو، نه ترپندی، نه ده کی جواب وئردی. م ج.
گؤروندویو کیمی آذربایجان تورکجه‌سی‌نین شیفاهی و کتبی قوللاری‌نین ایکیسینده ده بو باغلاییجی ایشله‌نیر. اما اونون فارس کؤکنلی بیلیب دیلیمیزده ایشله‌نیب ایشلنمه‌مه‌یی حاقدا بیر قرار کسه بیلمیرم. معین فرهنگی اونو پهلوی‌دن گلمه بیلیر. گئرچکدن بو باغلاییجی پهلوی دیلیندن گلیبمی یوخسا ....؟ بونو گیرامیر اوستادلارینا و فیلولوقلارا تاپشیرماق لازیم.
ی س: استانبول تورکجه‌سینده ده ایشله‌نیلیرمیش. سایین سیامکدن بونو وورغولادیغی اوچون تشککور ائدیرم.
آرتیق بیلگی اوچون بورایا باخا بیلرسیز:
