هاوادا دولانان قورام‌لار و قورامسیز بیلگی‌لر
Friday, 15 November 2013، 09:31 AM
هردن بیر سیرا کیتاب اوخویان گنجلره راستلاشیرام. هر ساحه‌ده اولور اولسون چوخ فرق ائتمیر، اینسانی اینجیده‌ن بیر شئی وار: تئوریک کیتابلار آردیجیل اولاراق چئوریلیر، سونرا هامی اوخویور. ادبیات اوخونمادان ادبی نقد اوخونور، توپلوم تانینمادان سوسیولوژی اوخونور و ایرانین چاغداش گوج تاریخینی بیلمه‌ین بیر گنج گئجه گوندوز سیاست بیلیمی اوخویور.
اوسته‌لیک بیریسی
سیاست تئوریسی اوخوسا داها ادبیاتدان، موسیقی‌دن هئچ شئی بیلمه‌ییر و ادبیات
اوخوسا سوسیولوژی‌دان، فلسفه‌دن و سیاستدن قاچیر و اوست اوسته هامیسی دا مذهبی
فضالاردان قاچیرلار.
هر شئی هاوادا
دولانیر، تئوریلر هئچ بیر شئی‌له اوست اوسته دوشمه‌ییر. بو گنج‌لرین چوخلاری دا
البت اؤز یالنیزلیقلارینا اعتراف ائدیرلر. اصلینده بو یالنیزلیغین تمل دووارینی
اؤزلری چکیب‌لر.
بو آرادا نئچه ساحه‌نی
تانیماغا جان آتان گنجلره ده آزاجیق راست گلمک اولور. بونلارین ایسه ساییلاری اولدوقجا
آزدیر.
گئنل اولاراق بیزیم
سورونلاریمیزدان بیریسی ایکی نسلین آراسینداکی بیر فرقدیر. اورتایاشلی قوشاق
توپلومدان، ادبیاتدان و گوج موناسیبتلریندن بیر شئیلر بیلسه ده تئوری
ساحه‌سینده گوجسوزدور. یئنی یئتمه‌لر ایسه تئوریک باخیمدان گون گله گوجلنمکده
اولسالار دا ادبیاتیمیزی، توپلوموموز و اؤلکه‌میزده اولان سیاست قوروملارینی و
شخصلرینی یاخشی تانیماییرلار.
ی س: باشلیقدا گئدن بیلگی سؤزجویونو معلومات آنلامیندا ایشلتمیشم.
آما سانیرام ایران تورکلرینده بیر باشقا مسئله ده "اؤزوموزو تانیماماق"دیر، سانیرام بو تانیماماق بوتون ساحه‌لرده وار: ادبیات، موسیقی، نقاشی و باشقا هنرلر. بو تانیماماغین دا بؤیوک ندنلریندن "اونلار قدیمی‌دیرلر، کندلی‌دیرلر و من مودئرن اولماغا دوغرو گئتمک‌ده‌یم" دییه دئییپ گئچمکدیر. بو اوزدن اؤز کؤکوموزدن و وارلیقلاریمیزدان قوپموشوق و سیزین منظورونوزو یالنیش آلماسام "هاوالارداییق"!