تارلامیزی ساتماسایدیق
بیر آز سونرا
گیلاسلار گول آچاجاقدیر
اوندا سنی سالخیم سؤیود کؤلگه‌سینه
قوناق چاغیراردیم.
یارپاق شکیلینی یانسیدان سودا بیز ده باخاردیق اؤزوموزه
زامان اؤتور باخ!
دوشوبدور دن ساچلاریمیزا
- « آغ ساچلاری سئون‌لر ده وار» - او دئدی ها!!!-
گیلاسلار گول آچیب
گؤل بولاغیندا سو ایچن ایلان
میفیک بیچیمده خاطیرلادیر سونونجو بویو
یازلار پاییزا دوغرو
و سئوگی‌لر
آیریلیغا
و من یاشادیغیم شهرده بللی دئییل فصیل‌لرین ده‌ییشیلمه‌سی
هامیسی خزان
هامیسی.
تارلامیزی ساتیب کؤچمه‌سه‌یدیک
قیرخ قیزلاری قوناق چاغیراردیم
سنله
چیچک درمه‌یه گلسین‌لر
یازین سون آییندا
تارلامیزی ساتدیق
ساچلاری آغارتدیق
و بیله فورصت اولمادی هئچ آغ دنه‌لره باغدا آخان سویون گوزگوسونده بیریول بیرگه باخاق
آرابایا یوکله‌دیلر عؤمروموزو
دوراغیندان آیریلیغین اؤلوم دایاناجاغینا
هر ساعات
بیر گونلوک یول کسدی
سینیرلاری آشدیق
و سئوگی
دیپورت اولدوغوموز اؤلکه‌لرده گئری‌‌ده قالدی
گؤروش زامانی دا.
اؤپوشلرین دادی قابار وورموش دوداقلاردان
بئینیمیزین هانسی بوجاغینا داشیندی، داشینمادی
آنیمسایا بیلدیک یوخسا آلزایمر توتموشدوق
یاز چاغینی
گیلاس چیچک‌لرینی
تارلامیزین ساتیلماغینی
آنیمسایا بیلدیک یوخسا آلزایمر توتموشدوق؟
« آغ ساچلاری سئون‌لر ده وار!» دئمیشدین
آلزایمیری نئجه
اؤپوشون دادینی اونودانلاری دا سئویرمیسن هله؟
- « بیز هئچ اؤپوشمه‌دیک کی!»
اؤپوشمه‌دیک، دوغرو!
و داماغیمدا قالدی دوداقلاری‌نین نیسگیلی
*
تارلامیزی ساتدیق
تارلامیزی ساتماسایدیق...
فروردین 90 - بیات
