دیرناق آراسی یازیلار

اوتورماییرمیسان؟

سورون سندن داها بؤیوک

مندن داها بؤیوک.

بیلیرسن کی

آرامیزدا اولوب کئچن‌لر...

سو اوزونده بیر تصویر دئییل

بلکه بؤیوک، بؤم بؤیوک بیر نسنه‌دیر

بو گؤی کیمی

گوجسوزلوک آنیندا گؤیو نئجه تئرور ائتمک ایسته‌ییریک؟

بئش دقیقه داها دا اوتورماییرسان؟

چوخ شئی وار اورکده

چوخ حوزون.

هئچ ده قولای دئییل

دویغولاری لحظه‌لرده اؤلدورمک

سنین سئوگینی زیبیل قوتوسونا آتماق.

بیزیم سووخامیز سئوگی‌دن... شعردن.... حوزوندن...

چؤرک‌دن... دوزدان... تنبکی‌دن... و خاطیره‌لردن

هر بیر یاندان بیزی قومارالاییر

تکی آزجا دوشونسن نه ائتدیگینی

سورون

سندن داها بؤیوک ... مندن داها بؤیوک