اوچوروم اوزرینده نوتلار 3 و 4
3
🔹اسفار کاتبان رومانی
اوزون سورهدن سونرا ابوتراب خسروینین "اسفار کاتبان" آدلی رومانینی اوخویا بیلدیم. رومانین دیلیندن و روایت بیچیمیندن لذت آلدیم، آنجاق تنقیدله یاناشدیغیم یئرلر ده وار. بو رومان هوشنگ گلشیری مکتبینه عایید بیر روماندیر. گلشیری مکتبینه نه آدی سئچهجهییمی بیلمیرم. منجه گلشیری "ماژوریته ادبیات"ا عایید بیر سیما ساییلمالیدیر. بونلار هر زامان یئنیچی و نیمانی دستکلهین اولسالار دا، نهایتده ایراندا اوزون ایللر سورهسینده آخیب گلن مرکز محور و آنتی اقلیت ادبیاتا باغلیدیرلار. ابوتراب خسروی متنینین دیلینی یاریم آرکائیستیک بیر سلطنتی دیله جالاقلایاراق صفوی – قاجار زامانیندا اولوشان نثره آرخالانماقدادیر. خسروینین روایتینده شیرازدا و بوشهرده اولان سولطانلار و حاکیملر هامیسی فارسدیرلار و آرادا تورک، قبچاق کنیزلر وار، بیر ده وحشی لور، تورک و عرب قبیلهلری. تیموریلردن حاکیم اولاراق آد گئدنده اونلار تورک دئییل تاتاردیلار و جغتایی لهجهسی ایله دانیشیرلار.
فارس ایله یهودون مشترک قدیسلری و مشترک تاریخلری، اؤزلملری و عین حالدا سورونلاری واردیر. خسروی فارس و یهود تاریخینا تنقیدی یاناشسا دا آنجاق اونلاری تاریخین متنی، باشقالارینی ایسه تاریخین حاشیهسی کیمی گؤستریر.
رومان ییغجام یازیلیبدیر؛ بوش بوغازلیغا یول وئریلمیر رومانین ایچینده. خسروینی براهنی ایله توتوشدورماق اولماسا دا آنجاق سانیرام بوتونلوکده گلشیری گیلین متنمحورلیکلری ایله براهنی-ساعدینین فولکلور محورلیگی بیر جیددی آراشدیرما قونوسو اولا بیلر. بونون کؤکلرینی اوریانتالیسم ایله سولچولوقدا دا آراماق یئرسیز دئییل. اوریانتالیسمده خسروینین رومانیندا اولدوغو کیمی اسکی مزارلار و کیتابلار آختاریلیر آنجاق سولچولوقدا خالقلارین اینانجینا باش چکیلیر. ایراندا اولان اوریانتالیسم فقط بیر قؤومون دیلینی، تاریخینی و متنلرینی مرکزده قرار وئردیگی اوچون بو اؤلکهده یاشایان باشقا خالقلاری گؤرمزدن گلیر. اؤته یاندان مینوریته ادبیاتینین یارادیجیلاری اؤز خالقلارینین تاریخی قایناقلاریندان خبرسیز اولدوقلاری اوچون گوجلو اثرلر سرگیلهیه بیلسهلر ده آنجاق ایشلرینده بیر حالقانین ایتمیشلییی گؤزه چارپیر. ان آزیندان اوریانتالیستی اورتاما آلیشمیش مخاطبلرین گؤزلری بو اثرلرده بیر شئی آردینجا گزیر ده اونو تاپا بیلمیر.
4
🔹آلاشیم سؤزجویو
بو گون تورکجهده یئنی بیر کلمه اؤیرندیم: آلاشیم.
آلاشیم آلیاژ آنلامینی داشیییر. بو کلمه یئنی دوزلمیش و اؤز تورکجه بیر سؤزجوک ده دئییل، عوثمانلی زامانیندا دا یایغینمیش. آلا بیزده عمومن ایکی رنگدن یا ایکی حالتدن تشکیل اولموش شئیلره دئییلر. مثلا ایکی رنگلی اولانلارا آلا دئییلر. ها بئله بیر طرفی پیشمیش بیر طرفی چیی قالان یئمهیه آلا-چی یا آلا-پیشمیش و بیر نفرین بیر ایشه کامیل رضایتی اولماسا آلا-گؤیوللو دئییلیر. اسکی متنلرده ایسه دده قورقود کیتابیندا گئدن آلا سئیوان کلمهسینی اؤرنک وئرمک اولار
- 19/01/24
قورخاقلار همیشه فقط دانیشاللار قورخاقلار همیشه قاچاللار..هه