شعر گلنده بیلن شاعر - علی بیانی
سید حیدر بیات حاقیندا یازماق، آسانلیغی قدر چتین دیر.
نیه آسان نیه چتین؟
بو سورغویا جواب وئرمک اوزوده هم آسان دیر هم چتین.
آخی اونون شعرینی راحاتجاسینا اوخوماق اولور، دوشونمک اولور آما راحاتجاسینا اونون حاقیندا یازماق اولمور.
⤵️⤵️
دی آیی نین ۲۵ ینده زنگان دا اشراق انجمنی سید حیدر بیات دان تقدیر ائتدی. اونون بهانه سیله بو یازار نئچه جمله دانیشدیم. ایندیسه اونلاری سیز حورمتلی اوخوجو ایله پایلاشیرام.
⤵️⤵️
سید حیدر اوزو دئمیشکن تورکجه میزی بیر تورکلوق کیمی سئویر و اوندا چوخ گوزل لیک لر آرایارکن گورور. انصاف لا دئسک بو دیلده اینجه له دیگی و تاپدیغی شئی لری من ایلکین دفعه گورموشم. بو آختارش لار دیل اهلیندن یوخ بلکه دیشاری دان باخان و البته تورکولوق اولان بیر کیمسه دن گوزله نیلیر.
⤵️⤵️
حیدر بیات شعریمیزده شعاردان باشقا نسنه لری یارادان لارین ایلکین لرین دن دیر. یعنی جیلخا، ناب، محض و آچیق دئسم شعارسیز شعر یازان دیر. دیله بیر دیل کیمی باخماق و بیر دیل کیمی گوسترمک بیزیم کیمی وانفسالی ادبیاتی اولانلارا اوزو بیر بویوک غنیمت ساییلمازمی؟
⤵️⤵️
سید حیدرین شعری فعالانه یازیلیر نه منفعلانه. جواب دئییل اوزو سورغودور. بیر کیمسه نی نفی ائتمیر اوزونو اثبات ائدیر.
⤵️⤵️
یوخودا باسیلان عسگر کیمی قیلنج قالخان آختارمیر، قالا باشینداکی آییق ساییق عسگر کیمی بوتون یول یولاغا اشرافیت له باخیر.
⤵️⤵️
شاعر دردی، حسرتی و قایغینی باغیرمیر، بلکه اونو سوزجوکلر ایله گوسته ریر. هر کیمسه اونون دیلینی دوشونه بیلمه سه، یا دوداغینی باغلی گورسه، قولاغینی اونون اورگینه دایایا بیلر:
بیر سوز سویله مه یه
دوراغیم آچیلمیر
قولاغینی کونلومه دایا
دیلینی بیلیرمیسن؟
⤵️⤵️
ائیواز طه دئمه لی شاعر ایدئولوژی و جیلخا شعر آراسیندا قالاندا نئیله مه لی دیر؟
گوره سن نئچه سسلی لیک (poly phonic) دن باشقا بیر یول وارمی؟
سید حیدر نئچه سسلی دیر. آما بو نئجه سسلی لیک چوخ ظریف گوسته ریلیر. ظاهرده شعارسیز و بیر یونلو گورونن شعرلر، چوخ دا متعهد و گورولی دیر.
⤵️⤵️
شاعر ساریمساق سئویملی بیر اولکه ده یاشاییر. آلمالاری بازارسیز دئیه کسیلن بیر اولکه ده. او آلما ایسته ییر. آما تعجب له قیزدان ائشیدیر:
آغاج لاری کسدیک. آلانی یوخودو.
سورا قیز خوشبختلیگ له خبر وئریر باغیمیزین اوزوم مولری قالیر. اتگی ساریمساق لا دولو قیز اونون شاشقین لیغینی گوررکن دئییر:
" سیرکه سیز ساریمساق بیر شئیه یاراماز، اوزوملوک لر دورور"
سیرکه دن اوترو اوزوملوک لری ساخلانیلان اولکه نین شاعری دیر سید حیدر بیات.
⤵️⤵️
آلما یولو شاعری نئچه دیله دارادیر. عربین کلاسیک و مدرن شعرینی اوخویوب ایزلییر. حسین منزوی نی درین دن و دوغرودان اوخویور. تورک کلاسیک شعرینی قوتادغو بیلیک دن توتاراق هیدجی یه قدر منیمسه ییر و البته یازاندا مدرن شعر یازیر. نئچه سسلی لیک اونون مدرن اولماسینی سسله ییر.
⤵️⤵️
آلما یولو شعر مجموعه سی دوققوز ایل بوندان قاباغا عاید دیر. شاعرین بو ایل لرده فکرینده آلچاق اوجالیق اولا بیلر. البته اوندان قالخینما و یئنی لیک لر گوزله نیلیر. بو گوزلنتی نی یوباتمادان سید حیدر حضرتلریندن ایسته ین لر چوخدور. گورک شاعریمیز آلما یولو استقامتینی، نئجه داوام ائده جکدیر.
۲۵ دی ۹۶
علی بیانی- زنگان
