اؤزومون اولمادیغیم یئرده
گلیرم یازام ووجودومون پارچالاری داغیناق دوشوب، روحومون پارچالاری داغیناق دوشوب، سپیلیب سئوگی ایله سیاست آراسی، دوشونجه ایله بوشلوق و من ایله سن، سیز، اونلار آراسیندا و گئجه ایله گوندوز آراسیندا، اوشاقلیقدا گؤره بیلدی‌ییم و ایندی گؤزومون سئچمه‌دیی اولدوزلار دا بیر آز اوغورلاییب آپاریبلار پارچالاریمدان و یولدان کئچن حتی منیم مینمه‌دییییم اتوبوسلار، قاطارلار، گؤیدن اوچان طیاره‌لر بیله آپاریبلار منیم بیر آزیمی ...
هر گوندوز مندن بیر آز قازیب آپاریر گئجه‌نین باغرینا و هر گئجه بیر آزیمی قازیب آپاریر گوندوز ایشیغینین قارانلیقدان داها گؤرونمز درین‌لرینه...
سن؟ سنی گؤزله‌میرم گودو سندن داها چوخ اومود وئریجی‌ایدی...
من؟ لنگرسیز بیر گمی‌یم، اؤزومو اله توتا بیلمیرم اؤزومه "من" دئیه‌م.
وطنی ده کی تانیرسان، منی سانسور ائله‌دیگی کیتابلارین ایچینده تک باشیما بوراخیب....
گلیرم یازام، تیکه‌لریم بیر یئره ییغیشمیر، ووجودومو دیدیک دیدیک ائدیب آپاریبلار آلیبلار مندن.
نه‌دن سؤز آچیم سنجه، اؤزومون اولمادیغیم یئرده؟
