حتیلیق
[نوت: بو گونلر سئچیم مناظرلرینده حتی آذربایجان، حتی کردستان کیمی اصطلاحلارین ایشلنمهسی سوسیال شبکهلرده تپکیلره سبب اولوب. نشره حاضیرلادیغیم «سو اوچلویو»مجموعهسینده حتی قونوسوندا قارالادیغیم پاراگرافلارین ائرکن نشرینین یئرینه دوشهجهیینی دوشوندوم.]
...سیگارا سوردورور سورگونلویومو، شاشقینلیمی، عاشیقلیغیمی، شاعیرلیییمی.
و حتی حتیلیغیمی سیگارادیر سوردورن. بو حتیلیق قونوسو اؤز یئرینده ایلگینج بیر قونودور. مظفرالدین شاهدان الیمیزده اولان بیر سورو خاطیرات پارچالاری وار. بیریسینده اووا چیخدیقلارینی یازارکن، کهلیکلرین چوخلوغوندان و هر کسین چوخلوجا کهلیک وورا بیلدیییندن سؤز آچیر. بیر منیم کیمی ال آیاقسیز دا واریمیش موکب همایونیده. بو آرادا او آدام دا ایکی دنه کهلیک اوولاماق شانسینا صاحیب اولور. مظفرالدین شاه، کهلیکلرین بختی ائلهجه چؤنموشدوکی، حتی او دا اونلاردان ایکیسینی ووردور، یازیر.
بو حتییا قونو اولماق ماجراسینی حیاتیمدا چوخلو یاشادیم. ماراقلیسی بودور کی سیگارانی دا بوراخسام منی تانییانلار سیگارانین بوراخماغینین اولاسیلیغینا اؤرنک گتیرنده، حتی منیم ده سیگارانی بوراخدیغیمدان سؤز ائدهجکلر.
سیگارا اؤنملیدیر. مجید ایله حوجرهده یاشادیغیمیز ایللر، بیر بؤیوک سلطانی بیچیمده اولان کلاله خاور یاییم ائوی یاییملایان مثنوی، ابن تورکهنین تمهید القواعدی، سونرا دا نئچه فقهی کتابلا یاناشی ابن عربینین کاغیذلا جیلدلنمیش و آدی اوخونمایان بیر نئچه بیتییی وارایدی. البته ایکیمیزده هامیدان گیزلی اولاراق رومان اوخویاردیق آرا سیرا. اما بیزیم آرامیزدا اصیل باغ قوران نه ابن عربی، نه ابن تورکه، بلکه سیگاراایدی. سونرا مجید هر زامان بیریندن سؤز آچاندا اونون فضیلتلرینی سایارکن، حتی سیگار دا چکر دئیردی. بو دئمک سون اوخ ایدی آماجا تاخیلماق اوچون. گئنلده ده تاخیلاردی...
- 17/05/06