شعر 41
Monday, 24 April 2017، 08:49 AM
یالان سؤیله‌دیلر اؤنجه سؤزجوکلرین واراولدوغونو
سؤزجوکلر شیطان دونیاسیندان سیزمیشدیلار
بیزی یوخ ائتمه‌یه
و گرچه‌یی
*
اؤنجه اینسان دئیه بیر سؤزجوک قویدولار دیلیمیزه و آییردیلار بیزی داشدان سودان بالیقدان قوشدان
و بیرینجی دؤنه سؤزجوکلر گلندن سونرا
داشی داش اولاراق الینه آلمادی اینسان
بیر سیلاح کیمی باخیب آدینا داش دئدی سونرا سیلاح دئدی
و سونرا اینسانی اینساندان آییردی سؤزجوکلر
بیریسی شاه اولدو بیریسی کؤله
سونرا سئوگی گلدی و چوبان اوغلانا عاشیق اولدو امپراطور قیزی
و سؤزجوکلر قویمادی بونلار کام-ی دل آلالار بیری بیریندن
چوبان قاییدیب نئیینه پوفله‌دی داغلار آراسیندا
و آناسی یامانلادی قارغیدی سؤزجوکلری سؤزجوکلرله
و سونرا سؤزجوکلر من دئین آنلامی باشقا یوروملا گتیردیلر سنه
و سونرا سؤزجوکلر بیزی آییردیلار
و من بیر داشا داش اولاراق باخدیم آدینی دوشونمه‌دن
داش سؤزجوکسوزجه دئدی
او دا بئله باخیب قاییداجاق
آنجاق سن دانیشما
یالنیز
قوللارینی آچ گلسه
