کارلو کلودییا مکتوب
پینوکیو کیتابینی ائویمیزین قاباغیندا اولان باغچا یانینداکی دره‌ده تاپدیم، اوردا دا اوتوروب هامیسنی اوخودوم. حسینین آناسی کیتابلارینی ائشیگه آتمیشدی.
سونرا شهره گلنده پینوکیولشدیم. باشقا بیر آدام یا حیوانی بئینیمه سوخوردو شهر، حتی پینوکیونون سیرکده ائششک اولدوغونو خاطیرلاییرمیسیز؟ اوراسی دا وارایدی.
سونرا بیر نئچه یالان دئدیم بورنوم اوزاندی. مهربان ملک گلیب بورنومو قیسالتدی.
اونلار اما دئدیلر یوخ بورنون ائله اوزون قالیب‌دیر.
بئله‌جه‌ایدی گؤردوم بو شهر حتی منی پینوکیو کیمی ده ایسته‌میر پینوکیونون کاریکاتورینی ایستیر.
کندیمیزه دؤندوم کیتابی بیر گون اوخودوغوم گوندن قاباق گونه. حسینی آختاریب تاپدیم. اونا دئدیم آنان کیتابلارینی آتاجاق ائشیگه. حسین کیتابلارینی گیزلتدی.
صاباحی گون حسینین آناسی گئتدی کیتابلاری ائشیگه آتا. کیتابلار یوخودو.
و بئله‌جه اولدو من پینوکیونو اوخومادیم.
فقط کندیمیزه قاییدان باش کارلو کلودییا بیر مکتوب یازدیم:
جناب کارلو کلودی
سلام
من سیزین کیتابینیزی اوخوموشام یانی دای اوخومایاجام. حسینین آناسی کیتابلاری تاپمایاجاق ائشیگه آتسین. بیزیم کندیمیزده ده کیتاب ساتان یوخدور.
فقط جناب کارلو کلودی! بوتون یونتاییجیلار ژیتو کیمی شفقتلی و مهربان دئییل‌لر. من بونو سیزه بیلدیرمک ایستیردیم.
سئوگی و سایقی ایله
کندیمیز – من - امضا
