گون اورتایا ایکی ساعات قالان
گون اورتایا ایکی ساعات قالان پارکدا اوتورموشام، ایکی ایشین آراسی، ایکی ساعات زامانیم بوشدور. لطیفه تکینین سئوگیلی عارسیز اؤلومو الیمده‌دیر، باخیرام گؤزلریم اینجیر، اوخویا بیلمیرم. زنگ وورورام دوستلارین بیریسینه، دئییر بیر روبعا گلرم اورا.
دوستوم احتمالن نئچه هفته سونرا بو شهردن گئده. دوستلاریمی دوشونورم و یالنیزلیغا دوغرو گلدیییمی. بیرینجی دوستلاریم کندیمیزده اولدولار، کنددن چیخماقلا معنوی و فیزیکی آرالار چوخالدی و نهایت او دوستلاردان منه و مندن اونلارا بیر آد قالدی. سونرا کی دوستلاریملا زنگاندا تانیشدیم و قوما گلدیکده یئنه کند دوستلاریمین حیکایه‌سی باشقا واریانتی ایله تکرار اولدو.
قوما گلدیکده حوزه فضاسیندا یئنی دوستلاریم اولدو، ادبیات و دوشونجه‌نی جیددی توتدوغوم دا اونلاردان دا بیربیر فاصیله آچدیم، اونلار قضاوته، وکالته دوغرو گئتدیلر من ایسه گوندن گونه درینلشن اینزیواما. دؤردونجو مرحله دوستلاریملا تورک ادبیاتی و دوشونجه‌سی آلانیندا تانیش اولدوم.ان اوزون سوره‌لی دوستلاریم بونلار اولدو، بونلار دا بیره‌ر بیره‌ر خاریج اؤلکه‌لره و باشقا شهرلره گئتدیلر و ایندی ساعات اون ایکی‌یه ایکی ساعات قالارکن من بو دوستلارین بیریسینی گؤزلورم، نئچه هفته سونرا تام تک قالاجام بو شهرده. بیر قوجا چالارلی اورتا یاشلی دوستوم قالیر آنجاق، بلکه اونونلا هردن بیر قهوه دمله‌ییب ایچدیک.
