بیر چایلیق صحبت
سئویملی شاعیر و دده قورقود شوناس حسین محمدخانی «گونئیلی» بو گون قومدا بیر چایلیق بیزه قوناق اولدو. دده قورقود، قوتادغو بیلیک و فولکلور حاقدا گؤزل صحبتلر گئتدی.
گونئیلی «دئییم‌لر سؤزلویو»نو ایکی جیلدده نشره حاضیرلاییب، اونون نشر مجوزینی آلمیشدی. بو ایش بیر قروپون ایشی‌دیر، آنجاق بو اینسان تک باشینا بو بؤیوک ایشی مقصده چاتدیریب‌دیر. بئله اثرلر یازیلمادان بیز کامیل بیر سؤزلوک یازا بیلمه‌یه‌جه‌ییک. آیریجا بوتون تورک ادبیاتی ایله اوغراشانلار و بو دیلی یازانلار بو کیتابی بیر یانداش کیمی اوزون زامان اؤزلرییله دولاندیریب، دیلیمیزین اینجه‌لیکلری و ظرفیتلری ایله تانیش اولمالیدیرلار.
بو کیتاب نشرینه تلسدی‌ییم معدود اثرلردن بیریسی‌دیر. اومورام بو کیتاب دونیا تورکولوژی قوروملاریندا دا جیددیه آلینب، تورکولوقلارین فایدالانماسی اوچون لاتین الفباسی ایله ده نشر اولونا.
