ناظیم حیکمتین آد گونو
بو گون ناظیم حکمتین آد گونو.
منجه ناظیم حکمت آذربایجان شعرینه اولومسوز ائتگیلر بوراخیبدیر. اونون موزیکال و آنادولو تورکجه‌سینین چکیمی (صرفی) اوزرینده قورولان دیلی بیزیم تورکجه‌ده جاواب وئرمه‌دی. بلکه او اوزدن ده مفتون امینی بیر مصاحبه‌سینده دئییر: یئنی شعر تورکیه تورکجه‌سینده جاواب وئریر بیزده یوخ.
نسه ناظیمین یئرینه اوندان سوراکی شاعیرلر مثلا جمال ثریا، اورهان ولی و ... شاعیرلر بیزده ناظیم قدر تانینسایدی داها اولوملو ائتگیلر بوراخاردی.
آنجاق بونلار ناظیمین بؤیوکلویوندن بیر شئی آزالتماز. محمود درویشین ناظیم حاقدا بیر سؤزو وار: «اؤنجه‌لر ناظیمه چوخ باش قوشمازدیم. سونرا دؤنوب اونون او عظمتده یارادیجیلیق میراثینا باخاندا شاشیب قالدیم.»
*
اصلینده بیز هامیمیز هر زامان ناظیمدن اوزاقلاشیب سونرا یئنه اونا دؤنه‌جه‌ییک. بیزیم ادبیات تاقچامیزین واز کئچیلمزلریندن بیریسی هر زامان ناظیم حکمت اولوبدور و اولاجاقدیر دا.
