دیرناق آراسی یازیلار

سحر یئللری منی آپاراجاقسا آپاراجاقسا آپاراجاقسا اؤزویله یوخلوق یوردونون هاراسیزلیغینا، گلمیرم دئمرم ساده‌جه سورارام هاردان گلیرسیز سیز؟

من یوخلوغا او دئمه‌سه بویون اه‌یمه‌رم

دوغرودور او اول دئمه‌دی من یاراناندا

او اول دئمه‌دی حتی من بیرینجی شعریمی یازاندا

اما من

بیرینجی دؤنه وار اولدوغوما گووه‌ننده او اول دئمیشدی و سونرا بیلمه‌میشدی اونا گؤره اولموشام

او بیلمه‌میشدی اؤزوندن گؤز اول دئینده هؤردویوم دار ایپینی یئره قویموشام

اؤزونه یاخشی باخ دئینده...

او بیلمه‌میشدی قیرخ قیزلارا گؤز یومموشام اوشاقلیق باغیندا

دئمیرم تانری کیمی یارادیب اونوتدو یاراتیقلارینی

اما بوتون یارادیجیلارین اورتاق فصیللری وار

شاعیرلر شعری یازیب دفتری باغلار

سئوگیلیلر سئو دئییب باشینی دؤندریب اوفوقلارا باخار

و سن یابانجی دیلدن آلینمیش بیر سؤزجوک کیمی یئنی یازیلمیش شعرین ایچینده یالنیز قالارسان

بوکولموش دفتر آراسیندا