چانتاسیز میسافیر / عبدالوهاب البیاتی
لامکاندانام
چؤهره‌سیز، تاریخ‌سیز، لامکاندانام
گؤی آلتیندا، ائشیدیرم، یئلین زاریلتیسیندا «گل!» دئیه منی سسله‌ییر
چؤهره‌سیز، تاریخ‌سیز، ائشیدیره‌م «گل!» دئیه منی سسله‌ییر
تپه‌لرین آراسیندان
تاریخین باتلاغیندان سووشور کیشی‌لر
قوملارین ساییجاق
سورکلی کیشی‌لر، سورکلی یئر
اؤنم‌سیز کؤلگه‌لر اونلاری اویدورور
تاریخین باتلاغی، کدرلی یئر و کیشی‌لر
تپه‌لرین آراسیندان
سانکی منه مین‌لر گئجه اؤتوب ، منه
من ایسه، بوش یئره، یئل‌ده ائشیدیرم
«گل!» دئیه منی سسله‌ییر
تپه‌لرین آراسیندان
و من و مین‌لر ایل
اسنه‌ییب، داریخیب، کدرلی
لامکاندان
گؤی آلتیندا
اؤزوم اؤز ایچیمده اؤلور، اومودسوزجاسینا
و من، و مین‌لر ایل
اسنه‌ییب، داریخیب، کدرلی
اولاجایام، سورکلی قالاجایام لامکاندا
چؤهره‌سیز، تاریخ‌سیز، لامکاندان
ایشیق منی صدمه‌له‌ییر، و اوزاقدان شهرین های-باساراغی
حیات یئنه اؤنومده سدّ اولور
لجاجتلی اؤلومدن بتر
یئنی کدر
گئدیرم بیر شئیه باخمایاراق و مین‌لر ایل
بیر شئی میسافیری گؤزله‌مه‌ییر، ایندیکی کدریندن باشقا
و چار – چامیر
و مین‌لر چکیرتیکه گؤزو و مین‌لر ایل
شهرین دووالاری ایشیلداییر
هانسی قازانجا گؤز تیکیم
سورکلی دونیادان، و کیرلی یارین
دیریلیر؟ آنجاق «یئتر!» دئمه‌ییر
آلینلاری عطیرلی جمدک‌لره، دیریلیر
حیات اؤزو
حیات یئنه اؤنومده سدّ اولور، یئنی کدر
لجاجتلی اؤلومدن بتر
گؤی آلتیندا
اومودسوز
اؤزوم اؤز ایچیمده اؤلور
هؤرومجک کیمی
اؤزوم اولور
دوواردا
گوندوز ایشیغی
مینیم ایل‌لریمی سومورور، اوزه قان توپورور، گوندوز ایشیغی
هئچ واخت مندن اؤترو دئییل‌میش: بو گوندوز
قاپی قاپانیر، بو گوندوز دئییل
هئچ واخت مندن اؤترودئییل‌میش: بو گوندوز
اولاجایام، بوش یئره، سورکلی قالاجایام لامکانیمدا
چؤهره‌سیز، تاریخ‌سیز، لامکاندان من
