اصول کافی‌دن سئچیلمیش ریوایت‌لر و حدیث‌لر ۱
نئچه واختدان بری، بعضی زامانلار اصول کافی کیتابی ایله مونس اولوب، ریوایت‌لر و حدیثلرینی دیلیمیزه چئویریرم. بو کیتاب منجه شیعه‌نین ان اؤنملی کیتابی‌دیر و اؤنمسه‌نیلن بوتون کیتابلار بوندان سونرا سیرالاردا یئر آلیرلار.
بوندان بری چئویردییم حدیثلردن بعضی‌سینی بورادا پایلاشاجایام. حدیث ایله ریوایتین آراسیندا بیر اینجه فرق ده واردیر، هله‌لیک اونا توخونماییرام.
(عقل و جهل کیتابیندان)
8. سلیمان دیلمی دئییر: امام صادق علیه السلاما بیر نفرین عبادتیندن، دینیندن و فضیلتیندن سؤز آچدیم. حضرت سوروشدو: او آدامین عقلی نئجه‌دیر؟ دئدیم: بیلمیرم. بویوردو: ثاواب عاغیل ایله اؤلچولر. بنی اسرائیل آراسیندا گئدیب آدادا یاشاییب عیبادت ائدن بیر کیشی وارایدی، آغاجلارلا دولو، داشقین سولار هر طرفیندن جوشان یام یاشیل بیر آدا (جزیره). بیر ملک دئدی: یا رب، بو قولونون ثاوابینی منه گؤستر. تانری گؤستردی، ملک ایسه او ثاوابی چوخ کیچیمسه‌ییب آز سایدی. تانری او ملکه وحی ائله‌‌دی ائنیب اونون یانیندا قالسین. ملک اینسان صورتینده او عابیدین یانینا گلدی. عابید سوردو: سن کیمسن؟
دئدی: من بیر عابید کیشی‌یم. سنین یئرینی و عیبادتینی اؤیرندیم، گلدیم بورادا سنینله تانرینی عبادت ائدم.
ملک او گون عابیدله قالدی. صبح آچیلاندا ملک دئدی: اولدوغون یئر چوخ گؤزل یئردیر، آنجاق عیبادته یاراشیر. عابد دئدی: بو یئرین بیر سورونو وار. ملک سوردو: نه‌ییمیش او؟ دئدی: تانریمیزین بیر قارامالی یوخدور. بیر اولاغی اولسایدی بورادا اوتاراردیق. بو آلاقلار بورادا هدره گئدیر. ملک دئدی: سنین تانری‌نین بیر اولاغی یوخمو؟ عابید دئدی: بیر اولاغی اولسایدیسا بئله‌جه بیر آلاقلار هدره گئتمه‌زدی کی.
تانری ملکه وحی ائتدی: بیز اونون عاغیلی قدر ده‌یر وئره‌ریک.
