آجی‌دیرمی؟
بو گونلر سایخاشلاریمدا ایتدیگیمیزی دوشونورم. تورک دیلی وار، آذربایجان وار اما بیز یوخوق. بیزیم نسیل، آذربایجان دئییب قارانلیق کوچه‌لری گزیب دارتیشان، سویوق پارکلارین تانیشی و هیجانلا سیگارالاری آرد آردا آلیشدیران.
بیلمزایدیک ائل دردی‌می یوخسا یار دردی او گئجه‌لر بیزی اویاق ساخلادان.
یوخوسوز صاباحلار تاریخه قووشور هر شئی قالیر آمما بیز یوخ اولوروق. آدلاریمیز جاندان دوشور، اؤزوموز بیر بیریمیزدن خبر توتماییریق، اورتایاشلیلیق بعضن قوجالیقدان دا سرت داورانیز بیزیم ایله.
دیلیمیز آستاجا آلت قاتلاردان اوست قاتا چیخیر و بیز اونون یئرینه درینلره باتیریق، یوخ اولوروق.
آجی‌دیرمی؟ بیلمیرم.
بوتون میللت‌لر بئله سورجلری یاشاییب، بورادا بو تاریخده بیزیم و بیزدن بیر ایکی کؤینک داها آرتیق داغیتمیشلارین پوشکونا دوشدو.
آجی‌دیرمی؟ هه آجی‌دیر هم ده چوخ. یالنیز رومانلاردا و شعرلرده گونشی قوناق گتیره بیلرمیشلر. بیز گونشی قوناق چاغیرا بیلمه‌دیک، بیر پاییر آخشامی، اونودولدوغوموزا بیر سیگارا داها آلیشدیریریق: بوتون اونودولانلارین سالیغینا.
