چییینلر
بعضی چییینلری، سون باشینی دایایاجاق دیوار کیمی گؤرر اینسان. هر دؤنه دایاغا احتیاجی اولدوقدا باشینی دایاماز. او سون آن گلدیکده، اینسان باشینی گتیرر، فقط او چیین اما باشی آلماز. باش، بوش حجمه یاخالانیب دوشر.
ایندی بئله بیر سوال وئرمک اولار: اینسانین ایللر بویو او چیینه گووندیی دوغرو بیر توتوم ایمیش؟ چون کی او گوونج، اینسانین زامان بویونجا آیاق اوسته قالا بیلدیینی ساغلاییبدیر. ایندی اونو یئره ییخسا دا.
تکی اینسان او چییینه بیر آددیم قالان اؤزو ییخیلسا، آتالارین اوشاقلاریلا گولشدیکده ییخیلدیقلاری کیمی. یانی گووه‌نج‌لر ده چوخلو زامان بیر اوشاق، بلکه بیر آددیم داها ایره‌لی، بیر قولچاق‌دیرلار. بیر قیزین گئجه‌لر قوجاغینا آلیب یاتدیغی قولچاق کیمی. آنجاق او قولچاق نه قدر باش قاتیجی، غیر جیددی سانیلسا دا، دونیانین ان جیددی وارلیقلاریندان بیریسی‌دیر. ساده‌جه آغلایاندا اونو باغرینا باسسان دا، اوندان الینه دسمال آلیب گؤزلرینی سیله‌جه‌یینی اوممایاجاقسان. بئله بیر توهمه قاپیلدینسا اویونون قوراللارینی سن پوزوبسان و سوچو اؤز یانیندا آختارمالیسان.
او سون آن باشینی دایایاجاغین چیینین ده ماجراسی بئله‌دیر. باشینی هئچ زامان اونا دایاما، آنجاق اونو دانسان قولچاقسیز بیر قیز اوشاغی قدر اومودسوز و یالنیز قالا بیلرسن.
راوی دئییر: آنجاق بعضن او سون آنین گلمه‌سی قاچیلمازدیر...
