اونلار سؤزلرینی یالنیز داغا دئیه بیلرلر
قاپالی توپلوملار تک سسلی اولور. عاشیقلر کیمی. اونلار هر یئرده اؤز سسلرینی آختارارلار. باشقا سس ائشیدنده داشا باسماسالار، دیک باخیب باشلارینی آشاغی سالیب یوللارینی داوام ائدرلر.
مجنونون آتاسی اونو کعبه‌یه آپاردی. کعبه یولوندا مجنون داغی گؤردو. بیر شعر اوخودو داغا، داغدا او سسی تکرارلادی. مجنون ایسه:
ساندی کی اوزویله هم نفس دیر
دئدی: "منه بیر رفیق بسدیر"
یوز شکر، کی یار غار بولدوم
گزدیم بو جهانی یار بولدوم
...
سن سن منه همدم موافق
داغ ایله اولور همیشه عاشق
(لیلی مجنون، فضولی)
گرچکدن ده فضولی بو تک سسلی‌لیک و تک سسلی‌لرین یالنیزلیغینی گؤزلجه دوشونوب تصویر ائدیبدیر. اونلار سؤزلرینی یالنیز داغا دئیه بیلرلر.
بیزیم کیلاسیک ادبیاتیمیزا باشدان باشا - بیز دئینده یانی ایسلام چئوره‌سینده یارانان ادبیات- تک سسلی ادبیات دئمک اولار. آنجاق سؤز ادبیاتدا قالیب، بیتمیر. توپلومون بوتون ساحه‌لرینی گزیب، دولاشیر و ادبیات توپلومون گؤسترگه‌سیندن باشقا بیر شئی ده دئییل اصلینده.
نسه، عاشیق-ین تک سسلی اولوب تک سسه قاپانماسی قبول اولونان و حتی سئویلین بیر شئی‌دیر. اما توپلوملارین تک سسلی اولماقلاری ...
*
بو گونلر آذربایجان مسائلی و مئدیا بحثلری آپاریردی دوستلار. نظره گلن بیزیم مئدیا ساحه‌سینده بیر اوغورسوزلوغوموز دا هر مئدیادا اؤز سسیمیزی آختارماقدیر. اوسته‌لیک چوخلو زامان سسیمیز بیر ارکستر سسی ده دئییل. گئری قالمیش، تاریخین هانسی بوجاقلارینا عایید، کؤکدن دوشموش بیر سازین قابا سسی‌دیر..
