جدل یوخسا صؤحبت؟
هر بیر میللتین و امتین تاریخی گلهنکلر، سنت‌لر و اینانجلارلا دولودور. بو گلهنکلر زامان، مکان سوره‌سینده تاپیلیب اولوشوبدور. بونلاردان هانیسی بیزلره ضررلی هانیسی ایسه بیزه قازانجلی اولا بیلر. بیزه قالان سووخالارلا قالینتی‌لار ایچینده صوفیه و متکلم‌لرین قالینتی‌سی باشقا ساحه‌لره گؤره داها یوغوندور. فقط صوفیه قالینتیلاری صفوی سونراسی ایراندا حیاتینی ایتیرمه‌یه باشلامیش اما کلام قالینتیلاری داها گوجلو اولاراق حیاتینا داوام ائتمیشدیر. مثلن سیاسی پارتیلارین آراسیندا و جمهور باشقانلاری آدایلاری آراسیندا اوز وئرن مناظره‌لر بیر طرفدن دونیا سیاست گله‌نکلرینه دایانیرسا، باشقا طرفدن ده متکلم‌لرین جدل و مجادله‌سینه دایانیر. جدل‌ده اؤنملی اولان هر بیر یول ایله اولور اولسون، قارشی طرفی محکوم ائدیب سوسدورمالیسان. باشقا دئییش‌له جدل‌دن حاققین نه اولدوغو اؤنملی دئییل، سن سؤزونو نئچه‌یه باشا گلیرسه گلسین، یئرینه اوتورتمالیسان. جدل‌ده قارشی طرف موطلق باطیل‌دیر و حاققین بوتونو سنده‌دیر. بو حاققی سنین گتیردیگین دلیل‌لر، ائتدیگین سفسطه‌لر، سسی‌نین یوکسلیگی و حتی تاماشاچیلارین های هویو هر حالدا ثبوتا یئتیرمه‌لیدیر.
بو عجیب غریب جدل گله‌نه‌یی‌نین قارشیسیندا آما بیزه عیرفاندان قالان و چوخ یایقین اولمایان باشقا بیر سنت ده واردیر: صؤحبت.
صؤحبت نه دئمکدیر؟ بیلیریک کی عاریفلر و صوفی‌لر هر بیریسی بیر سیلسیله‌یه باغلی اولوب او سیسلسیله‌دن خیرقه و ذکر آلارمیش‌لار. هر بیر صوفی و عاریف ذکر ایله خیرقه‌نی (ارادت خیرقه‌سی) یالنیز اؤز پیریندن آلا بیلر. آمما ایلگینج اولان بو کی باشقا سیلسیله‌لر کافیر و باطیل دئییل‌لر. هر بیر سیلسیله‌نین آدامی گئدیب باشقا سیلسله‌نین پیری و شاگیردلریله اوتوروب دانیشیب، معنوی احواللاری و تجروبه‌لرینی بیر بیریله پایلاشا بیلر. سهرودیه سیلسیله‌سی‌نین بیر چوخ یئتگین‌لری قونیه‌ده ابن عربی و صدر الدین قونوی‌نین یانینا گئدیب اونلاردان صؤحبت عونوانیندا فایدالاناراق عین حالدا اؤز سیلسیله‌لرینه وفالی قالیب‌لار
*
نظره گلن بیزیم ایچیمیزده اولان «جدل» اؤز یئرینی «صؤحبت» ایله ده‌ییشه بیلرسه بیر چوخ سورونلاریمیزی آرادان قالدیرا بیلریک.
