خیطابه
بو گون ارسلان صبح ساعات آلتی‌دا سو ایچمه‌یه اویاندی. صحبتیمیز شیرین گلیب یوخوسو قاچدی. بیر زامان گؤردوم صندل اوزرینده اوتوروب، سسینی یوکسلدیب، اللرینی اؤلچور. دئمک عائیله‌وی خطابه ائتمک گله‌نه‌یی اونون دا قانینا اوخوبدور. نه قدر دئدیم ارسلان یاواش! باخمادی.
اؤنجه سئویندیم.سونرا خیطابه‌نین ماهیتینه فیکیرلشدیکلریم یادیما دوشدو. دونن اینترنتده بئله بیر جومله گؤرموشدوم: حقیقتله اوزلشمکدن قاچماق اوچون ان یاخشی ایکی یول موزیک ایله یوخودور. منجه خیطابه ده عینن ائله‌دیر. خیطابه‌ده اینسان اؤز سسینه قاپیلیر. سسینی یوکسلدیر و هر شئی سسه (صوتا) دؤنور. آنلاملار بزه‌نیر، ریتمه دوزولور، موزیکال اولور و ایتیر.
انقلابلار خیطابه ایله باشلانار. سونرا خیطابه‌چیلرین باشینی بیر بیر یئمه‌یه باشلار. سونرا توپلومو یئییب چورودوب بوشا چیخارار. ان گؤزل خیطابه‌چیلر لاتین آمریکانین پارتییا باشقانلاری و لیدئرلری اولموش. هوگو چاوز کانسئر توتاندان سونرا بیله بئش ساعات خیطابه ائتمکدن چکینمیردی.
اونوتمایاق کی فلسفه‌نین ایلک گلیشیم‌‌لری خیطابه ایله اوز اوزه چیخماقدان باشلاندی. سوفسطایی‌لر هر شئیی گؤزل بیانلا یئرینه اوتورتماق اولار و آرادا گرچک آدلی بیر شئی یوخدور دئییردیلر. سقراط آیاغا قالخمیشدی او زامان.
فقط بو آرادا: بو گونلر ارسلانلا بیر آز آشیری بیچیمده "سلبی" اولاراق دانیشمیشام. بیلمیرم خیطابه‌نین ده زییانلارینی اونا دئییم می؟
