گرچک ایله خیال آراسی شعرسیزلیک
یئنی یئتمه‌لیک چاغلاریمدا منی بیر تئوری یازیق ائله‌دی. او زامانلار نسه دونیادا شعردن اؤنملی بیر شئی یوخ کیمی‌ایدی حیاتیمدا. بیر دوست علامه طباطبائی‌نین شاگیردلریندن، علامه‌نین دیلینجه بئله بیر سؤز نقل ائتدی: "شعر ایله فلسفه بیر بیرینه آیغیری‌دیر.کیمیسی فلسفه اوخوسا دای شعر یازا بیلمز."
من او زامان فلسفه ایله شعر آراسیندا، شعری ترجیح ائتدیم. اوزون سوره فلسفه‌نی اؤزومدن گیزلی اوخویاردیم. یانی کیتابلاری واراقلاردیم، اوخومورام کی، باخیرام دااا
یاواش یاواش گؤروشوم ده‌ییشمه‌یه باشلادی، مشائی‌لرین اوزانتی‌سیندا گلن علامه طباطبائی‌نین رئالیسمی هر زامان منه بیر "حشیش"ایدی. (حشیشین آچیقلاماسینی ی.س بؤلومونده اوخویا بیلرسیز.)
دونیا گرچک‌دیر، بیز گرچکلریک، گرچکلرله اوز اوزه دوروروق، یاشاییریق. ائله بورداجا گرچه‌یین اوزرینده دایاناندا، گرچک دونیانین نه قدر دؤزمه‌مه‌‌لی اولدوغو، گرچک داشینی آیاغیمین آلتیندا لاخلاداردی. یئنی‌دن خیالا قاپیلاردیم. ابن عربی ایله مالارمه، بودلر، رمبو آراسی پاندوللاشاردیم. یئنی‌دن یورولوب مشاء داشی اوزرینده دایانیب آشاغی‌یا باخاردیم. گرچه‌یین نه قدر قورخولو اولدوغو یئنه چکیندیرردی. هئچ زامان بیلمه‌دیم اؤنجه گرچکدن خیالا قاچدیم یا خیالدان گرچه‌یه. آنجاق بو ایکی دونیانین آراسیندایدی شعر.
دونن آخشام بو دونیالارین آراسیندا گیره دوشموشدوم یئنه. بوتون کائنات محو اولوب بیر ال قالیردی اوزاقلاردا الیمی توتماغا. تاواندان ائنیردی او ال، پنجره‌دن اوچوب گلیبردی بیله‌کسیزجه‌سینه، (دلی دومرول ناغیلی اولدو مو؟) الیمی آتیردیم توتام یولداشلار گؤرمه‌دن، سن گولومسه‌ییردین، گولومسه‌ییردین، گولومسه‌ییردین...
او دونیانی یاشادیم دا یئنه شعر گلمه‌دی.
ی س: حشیش عرب دیلینده کول کوس (kol kos)، خس و خاشاک دئمک‌دیر. بورادا او آنلامدا ایشلتمیشم: الغریق یتشبشث بکل الحشیش: دنیزده بوغولان اینسان هر کول کوسا ال آتار.
اویدوروجو ماتریال آنلامیندا گلن حشیش کلمه‌سی ده ائله بورادان آلینیب‌دیر. بیلدی‌ییمیز کیمی دیلده همیشه بیر سیرا تابو کلمه‌لر واردیر. او کلمه‌لرین آدی هئچ زامان دئییلمز و یئرینه باشقا کلمه‌لر قوللانیلار. حشیش‌ده اونلاردان بیریسی‌دیر. برتلس-ین حشیش قونوسوندا ماراقلی بیر آچیقلاماسی واردیر.
اللرین آغریماسین آقا سید!
«اوزومدن گیزلین» سوزو بتر توتدو منی. بیز چوخ زامانلار «اوزوموزدن گیزلین» بیر ایشلر گوروروک. بو ایشلری اوزوموزه رسمی لشدیرنده احساس ائلیریک کی بویویوروک. بورادا بیر درجه خودآگاه لیغیمیز یوخاری یا گئدیر.