شعردی ده...
شعرین دوواری ایراندا اوجادیر دئییرلر. بئله‌می؟ بو اؤلکه‌ده حافظ، سعدی، مولانا آدینا نئچه نئچه میللتین ایلکین حاقلارینی دانماق چوخدا چتین دئییل. یالان دا اولسا آنجاق دیللرده بئله بیر سؤز گزیب: سعدی‌نین شعرینی سازمان ملل-ین قاپی‌سینین اوستونه ووروبلار. بو اوستونه چوخ مهم‌دیر ها، حتی مثلن ساغینا یا سولونا دا دئییل، اوستونه ووروبلار. یانی چوخ چوخ مهم‌دیر.
داریوش شایگاندان بیر جومله اوخودوم:بیز ایرانلیلار همیشه هر ایشده حافظه، مولانایا مراجیعت ائدیریک و ایلگینج اولان دا بو: اونلارین همیشه بیزه بیر جاوابلاری وار. (بو جومله‌نی حافیظه‌دن نقل ائدیرم.)
بونون باشقا آنلامی بیر دؤورده گیره دوشوب، بیر دایره ایچینده فیرلانیب باشلادیغین نؤقطه‌یه قاییتماقدیر.
اما نییه شعردن یازماق ایسته‌دیم؟ بایرام گونلری موغاندا همت شهبازی‌یه قوناق ایدیق. آیلین، همتین بالاجا قیزی پولیسدن بیر شعر اوخودو. ابراهیم دئدی: به پولیسدن نییه شعر اوخودون، بیز قورخدوق! همتین بالاجا قیزی جاوابییلا بیزی هم گولدوردو هم دوشونجه‌یه دالدیردی: قورخمایین شعردی ده...
شعردی ده...
اما بو جومله یالنیزجا بالاجا آیلینا عایید اولان بیر جومله دئییل. بعضی میللی فعاللار بیزلری گؤرنده «آللاه یاردیمجی‌نیز اولسون میللتمیزین سیزین شعرلریزه احتیاجی وار. آنجاق میللتیمیزین دیره‌نیشچی موباریزلره احتیاجی واردیر. بو ائلین قهرمان اوغلانلاری موباریزه‌نی هر دورومدا اؤز شرفلرییله قاباغا آپارمالیدیرلار. سیزلرین شعری ده خالقیمیزی اویاتماق اوغروندا بؤیوک رول اویناییر.»
بو سؤزلرین آچیق آیدین آنلامی بئله‌دیر منجه: سلطان محمود هیندوستانی قیلینج ایله آلاجاق آنجاق سیز ده امیر معزی کیمی ریکابیمیزدا اولوب، هردن بیر شئی سؤیله‌یین.
بیر ایدئولوگ دا بئله دئییردی: سیاست ایشینی سیاستچیلر گؤرر، بیزده فقط شاعیرلر گلیب سیاسی نظریه وئریرلر، سیاست ایشی گؤرورولر، بونلار گله‌جه‌یه بیر ایش گؤره بیلمزلر.
بو ایدئولوگدان آنجاق سورمالییدیم: هله آفریقانین درینلریندن قافقازلارا و چینه کیمی بو قدر غیر شاعیر ایدئولوگ و سیاستچی، سیاسی ایش گؤروبلر. بونلار شرقین باشینا هانسی گولو سانجا بیلیب‌لرکی؟ یانی جیددن شرقده (بعضی اؤلکه‌لر استثنا اولاراق) هانسی اوغورلو اؤلکه‌دن سؤز آچیرسان سایین ایدئولوگ؟
نسه، منجه شاعیرلر اؤزلری تاریخی قارپیزی قولتوقلاریندان آتیب، ساده‌جه شعره فیکیرلشیرلر. اما خالقیمیزین موختلیف قاتلاریندا، شاعیرلره گؤره چئشیتلی تصورلار وار. همن تصورلار شاعیر – توپلوم آراسیندا اولان ایلیشگینی، خسته بیر ایلیشگی‌یه چئویریر.
سایین حیدر بیات
نظرینیزی قرآن - ی کریمین شعرا سوره سینده، شاعیرلره توخونان آیت لرینه گوره، بیلمک ایسته ییرم. مومکون اولورسا؟
وار اولون.