آلمایولو نا قیسا بیر باخیش - سعید قاسمی
منجه بو مجموعه اوزرینه ییغجام نظر وئرمک ایمکانسیزدیر. یانی بیرر بیرر هر شعرین اؤزونه باغیمسیز شکیل‌ده تنقید یازیلمالی‌دیر.
« گل قاپینی آچ
چوخداندیر کی بو کوچه
بیر دلی‌نین داشلانماسینا تامارزیلانیب
آیی گؤرمه‌سم کی دلی اولمارام »
شاعیرین ذهنینده و ال‌لرینده «کلمه» بئله تربیت اولوب کی نه معنا داشی‌یاجاغینی اوز توتوب، شاعیرین اؤزوندن سوروشور. شاعیر کلمه‌لرین سئچمه‌سینده و اونلاری اؤزل بیر قورولوشدا یئرلشدیرمه‌سینده بیر دقیق سوره‌جی گؤز اؤنونه آلیب‌دیر. منجه دئدی‌ییم سؤز شاعیرین «استثناسیز» هامی شئعرلرینده صادیق اولا بیلیر. ( بو اؤلکه، داغیت، چالماز شئعرلری).
سید حیدر بیاتین شعرلرینده ساده‌لیک و آخیجیلیق اولا اولا گیزلی بیر دوشونجه و حایاتدان حیکایت وار. اوندان اؤنملی حایات ایله دوشونجه اورتاسیندا گؤرکملی ایلگی آچیقجا گؤرونور و چوخلو یئرلرده ده گیزلی و اوستو اؤرتولو ایلگی‌دن قایناقلانیر. فایدالاندیغیمیز توپلودا شاعیر هم تغززللو خاص معناسین‌دا تجربه ائدیب، هم صمیمیت‌لی و صداقت‌لی اجتماعی بیر باخیشا ال تاپا بیلیب‌دیر. ( آت‌لار گئتدی/ قامچی‌لار کیمی الیمیزدن/ تپه میز قالدی/ قامچی ).
بعضن شاعر یاراتدیغی شعرلرده یوخاری سوییه‌ده باجاریغینی گؤستریر و گوجلو و آیدین بیر صنعت ایله طعنه‌لی - گیلئیلی سؤزلرینی اوخوجونون قولاغینا چاتدیریر. طبیعتدن شعرین بیر عونصرو عنوانیندا چوخ گؤزل بیچیم‌ده بو آماجا چاتماق اوچون فایدالانیب‌دیر. اؤرنک اولاراق قهوه چی قارداش شئعرینه باخا بیلرسینیز.
