وئب دونیاسینا دؤنورم
اوزون سوره‌دیر وئب دونیاسیندا یازماغا یئترینجه واخت آییرا بیلمیرم. آرتداق پیرتداق یازیلارلا، آییرا بیلدی‌ییم واختی داها دا اؤلدورورم. آنجاق یئنیدن بورالاردا یازماق قرارینا گلمیشم. وئب و سیته‌ده داها آرخایین و داها سامباللی دوشونوب یازماق اولور. دوغرودور، وئبلاگین باخیجی‌سی فیس بوکا نیسبت چوخ آزدیر. بو آزلیق بیر سورون ساییلسا دا، بورادا اولان تمرکوز و اوخوجولارین دیققتی واز کئچیله بیلیر بیر مسئله دئییل.
وئب دونیاسیندا یازماغا باشلاماقلا، اوخوجولارین بیر نئچه قونویا دیققت‌لرینی چکمک ده یئرسیز اولمایاجاق:
بیرینجی قونونو سایین مجد فرین یازدیغی بیر کامئنته جاواب اولاراق اورتالیغا آتیرام: سایین دوکتور مرتضی مجدفر "زبان ترکی و بحران تاریخی خط" نوتوما گؤره موناسیبتلرینی بئله بیلدیریبلر: « سلام. چوخ یاخشی مطلب دیر، آنجاق سرعت و عجله ایله مؤوضوعنون اوستوندن سووشموسونوز. هم ده مطلبین ایلکی بیر آز مبهم دیر. آدینی چکدیینیز دانشمند کیمدیر و ارتباطی بو مطلبله نه دیر؟ لطفا بیزی آیدینلادین.»
بیرینجی جومله‌نین جاوابی: بوتونلوکده وئب یازیلاریندا آکادمیک یازیلارین عکسینه بیر مطلبی اطرافلی آچیقلاماق سؤز قونوسو اولماییب‌دیر منه. چونکی هر بیر قونو اولورسا اولسون، یئترینجه تبیین ائتمه‌یینی ایسته‌سک، آزی بیر نئچه صفحه حجم و بیر نئچه گون آراشدیرماغا احتیاجیمیز واردیر. بو ایشی بعضی قونولارین اوزلرینده گؤرمک اولار. آنجاق بئینیمیزه گلن چوخلو قونولارین قلمه آلماق ایمکانی بیزدن آلیر، وئب اوخوجولارینین دا حوصله‌سینی قاچیرا بیلر. باشقا تعبیرله دئسم: بو یازیلار هئچ بیر بیلیم‌سل سونوجو اورتایا قویماق ایسته‌میر، ساده‌جه اوجادان فیکیرلشمک، بیر آز چیی دوشونجه‌لری دوستلارلا پایلاشماقدان چکینمه‌مک سؤز قونوسودور.
ایکینجی جومله‌نین جاوابی: او آدام یا خود بیلگین-ین آدی یادیمدا قالماییب‌دیر. مطلبله ایلگی‌سی ده، او آدامین دانیشیقلاری، بو قونویا بیر ده فیکیرلشیب، اوزرینده دوشونوب، بیر نوت یازماغیما سبب اولماغی‌دیر. امبرتو اکو دئمیشکن: کولتورل لافلاشماق (فارسجا: لاف زنی فرهنگی). بو شیوه‌نی بیلمیرم بلکه ده یئنی یئتمه‌لیک چاغلاریمدا اوخودوغوم کلیله و دمنه‌دن اؤیرنمیشم.
ایکینجی قونو: کؤشه یازیلاری تجروبه‌سی آلما یولو سایتیندا منه بیر شئی‌لر اؤیرتمیشدی. بو یازیلار سورکلی یازیلیب اوخونولورسا، قیسا سوره‌ده جمعی بیر ذهنین یاراتماسیندا بیزه یاردیمجی اولور. اولا بیلر بو جمعی ذهن آز ساییلی اینسانلارین آراسیندا گرچکلشین، اما بو قدری ده اؤنملی بیر اؤنم داشیییر منه. بو یازیلاردا اورتایا قویولان موضوعلاردان بیله یوکسک اؤنم داشییان صمیمیت، صداقت و بیچیم‌دیر. سن نه دوشونوب نه سونوجلارا واردیغیندان اؤنملی هانسی سورونلاری یاشادیغینی مخاطبه یئتیرمه‌یین‌دیر. بورادا گئدن کامئنت‌لر فیس بوک کامئنت‌لرینین عکسینه گرچکدن مطلبه سانجاقلانیب اونون ضمیمه‌سی دئییل، داوامی کیمی ده ساییلا بیلیر. سنتز اولایینینین گرچکلشمه‌سینی کؤشه یازیلارینین کامئنت‌لرینده چوخ گؤرموشم.
