سید حیدر بیاتین "سمبول" شعریندن "قادینسال" بیر اوخونوش – عطیه طاهری
بیر وولقان کیمی دیره‌نر بوغازیمدان
سووشار آغزیمدان
دوداقلاریمی تیتره دیب آچار
شعر گلنده بیلره م
کاغاذلار منه دوغرو باخار»
بو یازیلاردان جانلا دیلین بیر بیرینه چئوریلمه سی، جانلا کولتورون (تن و فرهنگ) بیر بیریندن گوج آلماسی آلینا بیلر. شاعیر سؤز داغارچیغیندان یاردیم آلارکن دوداقلارینی تیتره دیب، بوغازینا دیره‌نن وولقانی اؤزوندن ائشیگه چئخاریب اونا سیمگه‌لر ساحه‌سینده یئر آچیر .
«نئچه ایلدیر بئله‌دیر؟
سنه دوغرو چئرپئنان ایل لردن
بیر اسکولاستیک مدرسه نین حوجره لرینده آخشاملار بئله اولاردی
تانیمازدیم سنی اوندا
سونرا همن ایچیمده کی قیزیدین
فرهاد یوخومدا شکیلینی چئکردی گئجه لر
خسرو یاتاردی یاتاقدا
و من باخیشلاریمی معصومجاسینه اوفوقا تیکردیم »
سونرا شاعیر اؤزونو سورغولاییب، گلیجی وارلیغین یاشیندان سوروشارکن اونو بیر اسکولاستیک مدرسه‌نین آخشاملارینا نیسبت وئریر .
آخشام چاغی هاوا آلا قارانلیق اولوب ایشیقلا قارانلیغین مرزی ایتیر. ایشیقلا قارانلیق بیر بیرینه قوووشان چاغدا شعر اولایی اوز وئریر. او زامانلار شاعیر بو اولایی تانیمازیمیش، بئله دئییر روایت اولماسین.
زامان کئچیر و شعر شاعیرین ایچینده بیر قیزا چئوریلیر. ایندی قیزا چئوریلن «شعر»، «شاعیر»، «فرهاد» و «خسرو» بیر وارلیقدا یاشاماقدادیرلار . فرهاد، قیزا چئوریلمیش شعرین شکیلینی شاعیرین یوخوسوندا چکیر . خسرو یاتاغیندا یاتیر و شاعیر معصوم جاسینا اوفوقا گؤز تیکیب، قیزلا سؤیلشمگه باشلاییر :
«سارا بیر اولای‌ایدی موغاندا
خان ائوینه گئتسن ده گئت ! اوزونو آتما چایا
سیموول ایسته میریک غئیرته فیلانا
یاشا بیر آز- حایات سیموولو اول – سئودیکلرینه»
بورادا گوجلو بیر قادینسال دوشونجه وار . شاعیر قیزدان یاشاماق ، سئودیکلرینی یاشاماق ایستیر. قادیندان سئودیکلرینی یاشاماق ایسته‌گینی گون اوزونه چیخارماق، گلیشمیش بیر فیکیردن آسیلی اولاجاق. شاعیر ایچینده‌کی قیزدان سئودیکلرینی یاشاماق ایسته‌گینی اورتایا قویماقلا، ایچینده‌کی قیزا و بوتون اوخوجولارینا ودینله‌ییجی‌لرینه سئودیکلرینی یاشاماق جسارتی وئریر. بو قدر آسیلی دورومدا سئودیکلرینی یاشاماق ان رادیکال بیر یاشام ساییلیر . او قدر رادیکال کی سارانین اؤزونو چایا آتماغیلا برابر گلیر . سارا موغاندا اوزونو چایا آتماقلا سمبول اولورسا، سن سئودیکلرینی یاشاماقلا حیات سمبولو اولاجاقسان .
«من اورتا عصیرلرین کیتابلاری آراسیندا یورولاندا
بیر چئینه م ساققیز گل آغزیندا لامپا دوزلت آلدیرمازجاسینا
پولیس لری شاشیر بیر آز حئیرتله ندیر بو غریبه شهرین گزمه لرینی
چاخناشدیرپاسلانمیش سوموکلریمی تانگو- یلا
"قانون " کیتابیندان باش چئخاریب
ابن سینا
سنی تجویز ائدیر بوتون خسته لیک لریمه
خان ائویندن قاییتسان سا
بو قارانلیق کیتابخاناما...»
قیز سئودیکلرینی یاشاماقلا اورتا عصیرلرین کیتابلاریندان گلن یورغونلوغو آلاجاق، پلیس‌لری شاشیریب، گزمه‌لری حئیرتلندیره‌جک . بورادا پلیس و گزمه قانون سمبول‌لاریدیلار؛ قیز ایسه سئودیکلرینی یاشاماقلا، قانونلا دارتیشاجاق.
سارا اؤزونو چایا آتماقلا شاعیرین سوموکلرینی پاسلاندیریب، بوتون خسته‌لیک‌لری جانینا چؤکدوروب و کیتابخاناسیندان ایشیغی آلیب .
سوموکلرین پاسلانماسی، بوتون خسته‌لیکلر و کیتابخانانین قارانلیغی قادینساللیق یوخلوغوندان آسیلی گؤستریلیر. شاعیرین قیزی، سئودیکلرینی یاشاماقلا تانگویا چئوریلیب پاسلانمیش سوموکلری چاخناشدیریب، بوتون خسته لیک‌لری درمان ائدیب وشاعیرین قارانلیق کیتابخاناسینا ایشیق سالاجاق .
اورتا عصیرلرین کیتابلاری و قارانلیق کیتابخانا قادینسالسیز سیمگه‌لر ساحه‌سیدیر وقادین یاشاماقلا قاندینساللیق یارادیب، سیمگه‌لر ساحه سینده اؤزونه یئر آچیب و قارانلیق کیتابلارا ایشیق ساچاجاق .
