دیرناق آراسی یازیلار

هردن من دانیشاندا اؤزومدن اون یاش بؤیوکلر بئله سوروشارلار سنین نئچه یاشین وار بونلاری گؤروبسن؟ گرچکدن ده من چوخ شئیلری گؤردوم. مثلا ال چیراغی (چراغ موشی) چاخماق داشی (البته تفریحی اولاراق) ،فانیس, لامپا, زنبوری چیراغی, هیندیل ایله آلیشان استارتسیز ماشین، قاینار سودا استریلیزه اولان دمیر آمپول...

آنجاق بو گونلر هر شئیدن داها ایلگینج کیتابلار قونوسودور. من هله کیتاب خوراسی اولمادان ائویمیزده یالنیز قوتسال کیتابلار وارایدی. قرآن و نئچه یوز ایللیک دوعا کیتابلاری... سونرا بیلدیم بشر ایلک گوندن یازماغا باشلایاندا مین ایللر بویو یالنیز قوتسال نسنه‌لری قلمه آلارمیشلار و بیزیم ائوین یاریم تاقچالیق کیتابخاناسی بیر عتیقه معبد کیمی نئچه مین ایل بوندان اؤنجه‌یه عاییددیر. اورادا نه حماسه کیتابلاری وار، نه لیریکا... آنام سحردن آخشاما ماهنی اوخوسا دا، امر قدسی‌یه باغلی اولمادیغیندان دولایی یازییا کئچه بیلمز او ماهنی‌لار. او زامانلار من ماهنیلاری کاغیدا کئچمه‌یه باشلادیم و ائله بیل نئچه مین ایل تاریخدن گئری قالان ائویمیزین یاریم تاقچالیق کیتابخاناسینی ده‌ییشمه‌یه گره‌کن ساواشلاری تکیمه آپاردیم. بونون یورغونلوغو هئچ مزاردا دا جانیمدان چیخمایاجاق سانیرام.