دوکتور هئیت کیملی‌ییمیزدن ساغلام بیر اوخونوش
تاریخلر دوزگون یادیمدا قالماز. 1380 اولمالییدی. دوکتور هئیتله قیسا گؤروشوموز اولدو[1] وارلیق دفترینده. بیز نه سوراجاغیمیزی بیلمیردیک. بیر ایکی کلیشه سؤال سوردوق. اما فضولی دئمیشکن "دؤولت دیدار" میسر اولموشدو. دوکتورون اوتاغیندان چیخاندا هالدا فضولی‌نین شکیلی وارایدی. شکیله باخدیغیمیزی دویدوقدا بیر عجیب نشئه‌ایله دئدی: فضولی‌دیر. بوردا دا بیر شکیل چکک کیمیمیز دئدی. منیم گؤزلریم یومولو دوشدو شکیلده. شکیل‌لردن منه ده گؤندرین، باش اوسته دئدیک. سونرالار دوکتورون بیر موصاحیبه‌سینده فضولی‌یه گؤره هئچ یئرده اوخومادیغیم بیر جومله اوخودوم: من فضولی‌نین لیلی مجنونونو اوخویاندا روحوم گؤیلره یوکسه‌لیب، اورادا آغلارام.
هئچ زامان گؤروش تکرار اولمادی. کئچن ایل آرزیلاریمدان بیریسی بو ایدی: دوکتور قوتادغو بیلیک اوتوروملارینا گلیب باشیمیزا ال چکه. بونو محمدرضا[2]یا دا دئدیم.
بیلمیرم دوکتور هیئت نه قدر قوتادغو بیلیک اوخویوب، اما او شاه اثرین سطیرلرینده اونو گؤرمک چتین دئییل. او اوسسال آلانین قهرمانلاریندان بیری ده دوکتور هئیت دئییل می؟ گرچکدن من قوتادغو بیلیک اوخویاندا اورادا شخصیت‌لرین آغیر اکابیر اخلاقلی داورانیشلارینی، پالتارلارینین اوتو خطینی، نجابتلرینی، آریلیقلارینی آیدینجا گؤره‌رم و دوکتور هیئت یادیما دوشر. آی ایشیغیندا "آی تولدی" سعادت اولاراق گزیشنده قدرت ایله اخلاق ساراییندا، من دوکتور هئیتی گؤره‌رم.
دوکتور جواد هیئته گؤره چوخلاری یازیبلار، رضا براهنی‌دن توت باتی تورکولوقلارینا کیمی. اما منه گلدیکده دوکتور هئیت بیزیم کیمیلی‌ییمیزدن ساغلام اوخونوش وئرن بیر اینساندیر. اومورام فلک بیزیمیله مهربان داورانا و بیتمه‌یه بو ساغلام اوخونوشون سطیرلری.
