دیرناق آراسی یازیلار

سن دوز دئییردین:
سؤزجوکلرین الیندن نه قدر ایش گلر؟

بورادا تانری دا
مین دوداقدا تاویل اولور
ایتیریر آنلامین

بورادا اینسان دا 
بورادا اورک ده
بورادا سن ده
بورادا هامی دئییر:
هامی‌نین الیندن نه ایش گلر؟

بورادا بوغدادان کوسولور
آلمادان کوسولور
اینسان جنته دؤنمه‌ییر.
دؤنسه‌ بیله
جنتین الیندن نه ایش گلر؟

بورادا شئیطان کیمسه‌نین جیلدینه گیریب گلمه‌ییر
آپ آیدینجا ایبلیس آددیملاییر قالدیریمدا
کیمسه اونو تانیماییر
آرتیق
تانینسا دا
شئیطانین الیندن نه ایش گلر؟