دیرناق آراسی یازیلار

اوچ ایل اؤنجه بیر یول آخشامین سازاغیندا گیریب قوجاغیندا یاتمیشدیم. بو دؤنه قورخوردوم اورادا گؤرمه‌یم اونو. او اسکی آغاج تابوت. بلکه داها قوللانیلما‌یاجاق‌ایدی، سون ایچینه گیرن من اولدوم. فقط من ده اؤلو دئییلدیم، اؤلولرین سفرینین بیر چشمه‌سینی دئنه‌‌ییم دئیه ایچینه گیرمیشدیم. میخلاری آغاجدان ائشیگه چیخمیشدی، اونلاری باشماقلاریم و اللریمله ایچری‌یه سالدیم. بئش دقیقه اوزاندیم. یاغیش یاغیب تاختالاری ایسلانمیشدی. اوشاقلار نئچه شکیل چکدیلر. سونرا دئدیم بیر آز دینج بوراخین منی. اونلار باشقا مزار داشلارینی اوخوماغا گئتدیلر. گونشین قیزمار چاغییدی، تاختالارین شئهی ایله گونشین ایستیسی قاریشیب گؤزل بیر دویغو یاییردی بدنیمه. بو تابوتدا نئچه اؤلو داشینیب؟ بعضیلرینی تانیردیم. دینجه‌لیب دوردوم. فقط بونا فیکیرلشدیم بو تابوتا سون گیره‌ن کیشی من اولسام، اونون دویغوسو نه اولار؟ اؤلو داشیماقدان یورولوب؟  بیر اؤلو آغاجدان باشقا بیر شئی‌می‌؟  آرتیق اؤلو داشیمادیغی گون  اؤلوم گونومو ساییلیر؟ کیم داشییاجاق بو تابوتون اؤلوسونو؟

بو دوشونجه‌لر چوخ سورمه‌دی، تابوت قوجاغیما گیرمک ایستیردی.