دیرناق آراسی یازیلار

داندیم بوتون معبدلری
بیر معبد وار آنجاق
اورادا آدام تانری‌یا اینانیر
و کپنک‌ ائله تله‌سیک اوچور کی
سون آنینی
اورادا یاشاسین

بوشونا دئییل کی
قوجاغین 
کپنک‌لر مزاری‌دیر

بیلمیرم تانرینی کیملر یاراتدی
و سون قوتسال کیتاب
گیل گمیشین نئچه‌نجی توْرونودور
من توراتا داریخمیشام سنین دوداغیندا
گیلاس چیچک‌لری آچاجاق‌دیر بلقیس
و سلیمان 
اورشلیمین قیزلارینی گؤرمزدن گله‌جک

قوی خاخاملار وورنوخسونلار مئحرابین اؤنونده
و زاهیدلر
فضولی شعرینده

من 
کپنک‌ شعورونا اینانیرام
اونونلا اوچاجایام 
سنین قوجاغینا
بلقیس


---
قوتسال: مقدس
توْرون: نوه