گرچک ایله خیال آراسی شعرسیزلیک

 یئنی یئتمه‌لیک چاغلاریمدا منی بیر تئوری یازیق ائله‌دی. او زامانلار نسه دونیادا شعردن اؤنملی بیر شئی یوخ کیمی‌ایدی حیاتیمدا.  بیر دوست علامه‌ طباطبائی‌نین شاگیردلریندن، علامه‌نین دیلینجه بئله بیر سؤز نقل ائتدی: "شعر ایله فلسفه بیر بیرینه آیغیری‌دیر.

یارالارینی گتیر اوینایاق

 

اوزون زامانین سؤزودور سنی سئودی‌ییم. یانی من بیلمیردیم آدی کیم اولاجاق، بویو نه قدر، هانسی شهردن، کیملردن نه دیلده دانیشاجاق  بیله. اما اوزوم اوزوملوکدن شارابا چیخان کیمی بیلیردیم بیر جانا دوغرو گئتدیگیمی. قورخوردوم دا آرادا سدلر اولا، هئچ زامان یئتیشه بیلمه‌یم شرابا. حتی او یاخین آدالاردا کیمیلر منی آلدادا، یا من اؤزومو و من کیمیلری آلدادام. آنجاق او اصیل دئدیگیمیزین دادینی دیشلریم تانییارمیش. بونو بیلردیم، بیرینجی قوشون اوچوشونا وورولدوغدان برییمیش یوخسا بیرینجی سو شاریلتیسینا باییلدیغیمدان، دوزگون بیله‌نمیرم 

 

آغریلارینی الینه آلیب جسارتله اونلارا باخیردین. لعنت اولسون دئییردین. گؤزونو یوموردون آغریلاردان قاچماغا دئییل، ‌اونلارین ماهیتینه فیکیرلشیردین. بیر دونیالیق شرق غرب گله‌نکلرییله توتوشدوروردون. اؤزوندن یولا چیخماق ایستیردین هر شئییله قارشیلاسان، دوز اوزلرینه باخیب ساواشاسان و سونرا یارالارینا دوشوردون، دوشونوردون، بلکه یارالارینی باغلایان بیریسینی ده ایسته‌میردین، بیریسی اولا بو یارالارین درینلی‌یینی بیر بیله،‌ هه بیله، ائله بو قدر. حتمن اطرافینداکیلار دا ملاقه ایله اؤلچوردولر هر شئیی،‌ یا دولارلارین اوزانیسییلا، یورو دا سون گونلر گوندمه گلمیشدی، و ان بؤیوک شیفره، چک‌لرین شیفره‌سییدی.

پیشیک آتیلیب پنجره‌دن گئدیردی. چیخیردی آغاجا، کیمسه‌یه حیساب وئرمه‌یه‌جکدی، بونا دا دوشونموشدون. سون زامانلار دیله سیغینمیشدین، یارالارینی موطلق توخویاجایدین بو سطیرلرده. بؤیوک آنان تبریزین هانسی بازاریندان گلن خامالاری یاخشی تانییارمیش، هانسینی اورتالیق سالسین خالچایا هانسی پوتا، چیچگین ایچ قارالارینا سورمه‌ای‌ می چالسین قارا می؟ سن سؤزجوکلری بیر شرقی قادینین سلیقه‌سییله چالاجایدین سطیره،‌ لعنت اولسون بو قادینلیق تاریخی نییه بئنیمدن سییریلماییر بیر یانا، و سؤزجوکلر سطیرلری بزه‌ییردی، قادینین یئنی کاراکتئری او آجی گؤزللیک دوزولورودو سطیرلره.

 

تام سئودی‌ییم آجی‌یا دوغرو گئتدی‌ییمی بیلیردیم، شرابا دوغرو یولا چیخمیشدیم، سؤزجوکلرین باییلدیردی منی، گئجه دوواری‌نین اوزرینده یازیلارینا باخیردیم آی ایشیغیندا. بیر آددیم یاخینلاشیب بیر آددیم گئری قاییدیردیم، یئریمده‌جه دایانمیشدیم می؟ چیچک‌لرین آراسینی سورمه‌لی چالمیشدین، تام قرار وئره‌جه‌یین لحظه ده قارانلیقدان قاچا بیلمیشدین. چیچکلرین آراسینا یالنیز آریلار باش قوشار. اوچا اوچا قرارسیزجا. بو قرارسیزلیق اونلارین اوچوش گؤزللیکلرینی پوزمایاجاق قدر گیزلی اولارجاسینا اوچوب چیچک‌لری آرارلار. امین دئییلیم بیر آری قدر بیر بال آریسی قدر اوچوشوم گؤزل ایدی‌می، بیر جئیران قدر حئیرانلیغین اوفاجیق اولسا دا یادیما گلیر. بیر گئجه دووارین اوستوندن اوچوب گلمیشدیم. بلکه ده دنیزین روحو منی ایته‌له‌میشدی، آخی هئچ زامان اوچدوغومو، نییه بو قراری وئردی‌ییمی خاطیرلامیرام.

 

آغریلارین الینده ایدی، اونلارا باخیردین. بیر اویونجاق کیمی. 

 - اونلاری گتیر اوینایاق

-  نه؟

-  باخ من ده گتیرمیشم، گل قاتاق بیر بیربیرینه، هامیسییلا باهم اوینایاق.

قونشوموزون قیزی 8 یاشیمدا آرخ باشیندا گولومسه‌ین کیمی گولومسه‌میشدین، سونرا سن اوینا، من باشیمی داراییم گلرم دئمیشدین.

من گتیرن آغریلارین ایچینده داراقدا وارایدی؟

 

 

شعردی ده...

شعرین دوواری ایراندا اوجادیر دئییرلر. بئله‌می؟ بو اؤلکه‌ده حافظ، سعدی، مولانا آدینا نئچه نئچه میللتین ایلکین حاقلارینی دانماق چوخدا چتین دئییل. یالان دا اولسا آنجاق دیللرده بئله بیر سؤز گزیب: سعدی‌نین شعرینی سازمان ملل-ین قاپی‌سینین اوستونه ووروبلار. بو اوستونه چوخ مهم‌دیر ها، حتی مثلن ساغینا یا سولونا دا دئییل، اوستونه ووروبلار. یانی چوخ چوخ مهم‌دیر.

داریوش شایگاندان بیر جومله اوخودوم:

وئب دونیاسینا دؤنورم

اوزون سوره‌دیر وئب دونیاسیندا یازماغا یئترینجه واخت آییرا بیلمیرم. آرتداق پیرتداق یازیلارلا، آییرا بیلدی‌ییم واختی داها دا اؤلدورورم. آنجاق یئنی­دن بورالاردا یازماق قرارینا گلمیشم. وئب و سیته‌ده داها آرخایین و داها سامباللی دوشونوب یازماق اولور. دوغرودور،